Hakim Sahabo yasubiye mu bana! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri Kenya ikipe ya AFC Leopards ikinamo Gitego Arthur ku munsi w'ejo ku Cyumweru yatsindaga City Stars ibitego 2-1 mu mukino wa shampiyona. Muri uyu mukino Gitego Arthur yari yabanje mu kibuga gusa yaje gusimbuzwa ku munota wa 80.

Kugeza ubu AFC Leopards iri ku mwanya wa 2 n'amanota 9, ikaba izasubira mu kibuga taliki ya 20 z'ukwezi gutaha ikina na Kariobangi Sharks.

Muri Afurika y'Epfo ku wa Gatandatu ikipe ya Kaizer Chiefs ikinamo Ntwari Fiacre yatsindwaga na Mamelodi Sundowns ibitego 2-1.

Kuri uyu mukino uyu munyezamu w'Amavubi niwe wari mu izamu nk'ibisanzwe. Kugeza ubu Kaizer Chiefs iri ku mwanya wa Gatandatu n'amanota atandatu, ikaba izasubira mu kibuga taliki ya 26 z'ukwezi gutaha ikina na Super Sports United.

Muri shampiyona y'icyiciro cyambere muri Tunisia,ku munsi w'ejo ku Cyumweru ikipe ya Stade de Tunisien ikinamo Mugisha Bonheur yanganyaga na Esperance ibitego 2-2.

Uyu musore w'Amavubi yari yabanje mu kibuga ndetse yasoje n'umukino adasimbujwe. Kugeza ubu Stade de Tunisien iri ku mwanya wa 8, ikazasubira mu kibuga ku wa Kane w'iki Cyumweru ikina na Bizertin.

Muri shampiyona y'icyiciro cya mbere muri Ukraine ku wa Gatandatu ikipe ya FC Kryvbas Kryvyi Rih ikinamo Bizimana Djihad yatsindwaga na Oleksandriya igitego 1-0.

Kuri uyu mukino uyu Kapiteni w'Amavubi yari yabanje mu kibuga ndetse nta nubwo yigeze asimbuzwa. FC Kryvbas Kryvyi Rih iri ku mwanya wa 7 n'amanota 11, ikaba izasubira mu kibuga ku Cyumweru ikina na Dynamo Kyiv.

Muri shampiyona y'icyiciro cya kabiri muri Sweden ,ku wa Gatandatu ikipe ya Sandvikens IF ikinamo Byiringiro League na Mukunzi Yannick ufite ikibazo cy'imvune yatsindaga Brage igitego 1-0.

Kuri uyu mukino ntabwo Byiringiro League yigeze akinishwa gusa yari ku ntebe y'abasimbura. Kugeza ubu Sandkvens IF iri ku mwanya wa gatanu n'amanota 39, ikaba izasubira mu kibuga ku wa Gatandatu ikina na Ostersund.

Tukiri muri shampiyona y'icyiciro cya kabiri muri Sweden,ku munsi w'ejo ku Cyumweru ikipe ya Gefle IF ikinamo Rafael York yatsindwaga na Helsingborg ibitego 4-0.

Kuri uyu mukino,uyu mukinnyi w'Umunyarwanda yabanje mu kibuga ndetse nta nubwo yigeze asimbuzwa. Kugeza ubu Gefle IF iri ku mwanya ubanzariza uwa nyuma wa 15, ikaba izasubira mu kibuga ikina na Brage ku wa Gatandatu.

Muri shampiyona y'icyiciro cya mbere muri Azerbaijani,ku wa Gatandatu ikipe ya FC Zira ikinamo Mutsinzi Ange yatsindaga Kapaz ibitego 3-0. Kuri uyu mukino uyu myugariro w'Amavubi yari yabanje mu kibuga ndetse nta nubwo yigeze asimbuzwa.

FC Zira kugeza ubu iri ku mwanya wa 3 muri shampiyona, ikazasubira mu kibuga ikina na Turaz Tovyz ku Cyumweru.

Ku wa Gatanu muri shampiyona y'icyiciro cya mbere muri Cyprus ikipe ya AEL Limassol ikinamo Imanishimwe Emmanuel Manguende yatsindwaga na Omonoia ibitego 3-1.

Kuri uyu mukino uyu myugariro w'Amavubi yari yabanje mu kibuga ndetse nta nubwo yigeze asimbuzwa. Kugeza ubu AEL Limassol iri ku mwanya wa 7, ikaba izasubira mu kibuga ikina na Ethnikos ku wa Gatandatu.

Ku munsi w'ejo ku Cyumweru ikipe ya Standard de Liege y'abatarengeje imyaka 23 ikina muri shampiyona y'ikiciro cya kabiri mu Bubiligi yatsindwaga na RUSG U23 ibitego 3-0.

Kuri uyu mukino Hakim Sahabo wongeye kumanurwa muri iyi kipe y'abato ya Standard de Liege yakinnye iminota yose y'umukino.

Muri shampiyona y'icyiciro cya kabiri muri Leta zunze ubumwe za Amerika ku munsi w'ejo ku Cyumweru, ikipe ya Rhode Island ikinamo Kwizera Jojea yatsindaga San Antonio FC ibitego 3-1. 

Kuri uyu mukino nk'ibisanzwe uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu ikipe ya Rhode Island iri ku mwanya wa Gatandatu, ikaba izasubira mu kibuga ku Cyumweru ikina na Tampa Bay Rowdies.