Man United y'abakinnyi 10 yongeye gukambakamba imbere ya Tottenham Hotspur

Manchester United yari yakiriye Tottenham Hotspur mu mukino w'umunsi wa Gatandatu wa Shampiyona y'u Bwongereza English Premier League 2024-25.

Ni umukino Manchester United yamanutse ikubita agatoki ku kandi ishaka gutsinda Tottenham Hotspur, cyane ko imaze iminsi ishinjwa kwitwara nabi.

Eric Ten Hag utoza Manchester United abakinnyi yabanje mu kibuga ni Andre Onana, Mazraoui, De Ligt, Martinez, Dalot, Ugarte, Mainoo, Fernandes, Garnacho, Zirkzee na Marcus Rashford.

Abasimbura ba Manchester United bari Bayindir, Evans, Lindelof, Casemiro, Eriksen, Mount, Amad, Anthony na Rasmus Hojlund.

Tottenham Hotspur itozwa na Ange Postecoglu abakinnyi yabanje mu kibuga ni Vicario, Porro, Romero, van de Ven, Udogie, Maddison, Bentancur, Kulusevski; Johnson, Solanke na  Werner.

Abasimbura ba Tottenham Hotspur bari Forster, Spence, Dragusin, Gray, Bissouma, Bergvall, Sarr, Moore na  Lankshear.

Ni umukino Tottenham Hotspur yatangiye itungura abakunzi ba Manchester United bari kuri Old Trafford, kuko ku munota wa Gatatu gusa yafunguye amazamu ku gitego cya Brennan Johnson ku mupira yahawe na Micky van de Ven.

Kubanzwa igitego kuri Manchester United bisa nkaho ntacyo byari biyibwiye kuko Tottenham Hotspur yagumye kuyirusha umupira mu kibuga hagati ibinyujije mu bakinnyi bari bazonze Man United aribo Maddison, Bentancur na  Kulusevski.

Guhuzagurika kwa Manchester United, byatumye ku munota wa 42 igwa mu rungabangabo, nyuma y'ikarita itukura yahawe Kapiteni wayo Bruno Fernandez.

Igice cya mbere cyarangiye Manchester United yamaze gucika intege, kuko yari yamaze gutsindwa igitego, ndetse bakaba bakinaga ari abakinnyi 10.

Mu gice cya kabiri, Tottenham Hotspur yinjiranye igitego cya Kabiri, igitego cyabonetse ku munota wa 47 gitsinzwe na Dejan Kulusevski. 

Ibitego bibiri bya Tottenham Hotspur ntabwo byari bihagije ngo ibabaze abakunzi ba Manchester United, kuko ku munota wa 77 Dominic Solanke yatsinze igitego cya gatatu ku mupira yahawe na Pape Matar Sarr ukomoka muri Senegal.

Ibitego bitatu bya Tottenham Hotspur ku busa bwa Manchester United nibyo byasoje umukino, nuko Manchester united ikomeza gushira abakunzi bayo mu rungabangabo. 

Gutsindwa uyu mukino byatumye Manchester United ijya ku mwanya wa 12 n'amanota 7. Mu mikino itandatu imaze gukina, imaze gutsindwa itatu, itsinda ibiri, inganya umwe. 

Manchester United yongeye gutsindwa na Tottenham Hotspur 

Eric Ten Hag utoza Manchester United ari mu mazi abira 

Bruno Fernandez yabonye ikarita itukura yatumye adasoza umukino 

Tottenham Hotspur yakuye intsinzi kuri Old Trafford