Ahabanza Imikino

Misiri ishobora gukurwa mu mikino yo gushaka itike y'igikombe cy'Isi cya 2026

Yanditswe na: Aloys Niyonyungu
Taliki:23/09/2024 9:55 0

Ikipe y'igihugu ya Misiri ya Mohamed Salah ishobora gukurwa mu mikino yo gushaka itike y'igikombe cy'Isi cya 2026 nyuma y'uko ifitye ideni kompanyi yo mu Busuwisi.

Nk'uko ikinyamakuru cyo mu Busuwisi cyitwa Blick cyabyanditse, ikipe y'igihugu ya Misiri ifitiye ideni kompanyi yo mu Misiri isanzwe itegura imikino ya gicuti.

Iyi kompanyi hari imikino yayo ya gicuti yateguye none ntabwo yigeze yishyurwa. Ni byo byatumye itanga ikirego mu Kanama k'Imyitwarire mu Mpuzamashyirahamwe y'Umupira w'amaguru ku Isi, FIFA, kugira kabafashe kubona amafaranga yayo.

Taliki ya 30 z'ukwezi kwa 2 muri uyu mwaka aka Kanama kandikiye Ishyirahamwe ry'Umupira w'Amaguru mu Misiri kayimenyesha ko bagomba kwishyura iriya kompanyi mu gihe kitarenze iminsi 30 ndetse ko hari n'ibihano bafatiwe ariko ntibyakorwa.

Taliki ya 19 z'ukwezi gushize nabwo aka Kanama kandikiye Ishyirahamwe ry'Umupira w'Amaguru mu Misiri kayimenyesha ko hari ibindi bihano bafatiwe kandi ko bagomba kwishyura mu gihe kitarenze iminsi 30 gusa nabwo ntibyakorwa.

Kuri ubu ikipe y'igihugu ya Misiri ishobora gufatirwa ibihano bikomeye birimo gukurwa mu mikino yo gushaka itike y'igikombe cy'Isi cya 2026 kizabera muri Canada, Mexico na Leta Zunze Ubumwe za Amerika.

Iyi kipe y'igihugu muri iyi mikino iri mu itsinda A ikaba iri ku mwanya wa mbere n'amanota 10 aho irusha amanota 4 Guinea -Bissau iyikurikiye.