Harimo uwabonye ikarita y'umutuku! Uko Abanyarwanda bakina hanze bitwaye mu Cyumweru gishize

Duhereye muri Kenya ikipe ya AFC Leopards ikinamo Gitego Arthur, kuwa Gatandatu yatsinze Bidco United igitego 1-0 muri shampiyona.

Uyu mukinnyi w'Umunyarwanda yabanje mu kibuga ndetse arangiza n'umukino adasimbujwe. Kugeza ubu AFC Leopards iri ku mwanya wa 3 muri shampiyona ikazasubira mu kibuga ku Cyumweru ikina na City Stars .

Muri Libya, Al Ahly Tripoli ikinamo Manzi Thierry ku munsi w'ejo yatsinzwe na Simba Simba SC mu mukino wo kwishyura w'ijonjora rya Kabiri rya CAF Confederation Cup ibitego 3-1 ihita inasezererwa. Uyu myugariro w'Amavubi nk'ibisanzwe yabanje mu kibuga ndetse nta nubwo yigeze asimbuzwa. 

Muri shampiyona y'icyiciro cya mbere muri Ukraine, ikipe ya FC Kryvbas Kryvyi Rih ikinamo Bizimana Djihad ku Cyumweru yanganyije na Vorskia igitego 1-1.

Kapiteni w'Amavubi yabanje mu kibuga kuri uyu mukino gusa aza gusimbuzwa ku munota wa 70. FC Kryvbas Kryvyi Rih iri ku mwanya wa 5 muri shampiyona izasubira mu kibuga kuwa Gatandatu ikina na Oleksandria.

Muri shampiyona y'icyiciro cya mbere mu Bubiligi mu ikipe ya Standard de Liege ikinamo Hakim Sahabo, kuwa Gatanu yanganyije na Royale Union Saint-Gilloise 0-0. Kuri uyu mukino ntabwo uyu mukinnyi w'Umunyarwanda yabanje mu kibuga ndetse nta n'ubwo yari ari ku ntebe y'abasimbura.

Standard de Liege kugeza ubu iri ku mwanya wa 7 muri shampiyona ikazasubira mu kibuga ikina na Westerlo kuwa Gatandatu.

Kuwa Kane muri shampiyona y'icyiciro cya kabiri muri Sweden mu ikipe ya Sandkvens IF ikinamo Byiringiro League na Mukunzi Yannick uheruka kubagwa kubera ikibazo cy'imvune, yatsinzwe na Orebro igitego 1-0.

Byiringiro League ntabwo yabanje mu kibuga ariko yinjiyemo asimbuye ku munota wa 73. Sandvkens IF iri ku mwanya wa 6 muri shampiyona irasubira mu kibuga kuri uyu wa Mbere ikina na Degerfors.

Tukiri muri iyi shampiyona mu ikipe ya Gefle IF ikinamo Rafael York, kuwa Kane yatsinzwe na Degerfors igitego 1-0. Uyu mukinnyi w'Umunyarwanda yabanje mu kibuga asimbuzwa ku munota wa 79. Gefle IF iri ku mwanya wa 14 ikazasubira mu kibuga kuwa Gatatu ikina na Ostersund.

Muri shampiyona y'icyiciro cya mbere muri Azerbaijani, ku Cyumweru ikipe ya FC Zira ikinamo Mutsinzi Ange yatsinze Sumqayit ibitego 2-0. Uyu myugariro w'Amavubi yabanje mu kibuga ndetse nta nubwo yigeze asimbuzwa. 

Kugeza ubu FC Zira iri ku mwanya wa 5 muri shampiyona ikaba izasubira mu kibuga ikina na Kapaz kuwa Gatandatu.

Ku Cyumweru muri shampiyona y'icyiciro cyambere muri Macedonia, ikipe ya AP Brera Strumica ikinamo Rwatubyaye Abdul yanganyije na FK Rabotnički Skopje igitego 1-1.

Uyu myugariro w'Umunyarwanda yabanje mu kibuga gusa ku munota wa 52 aza kubona ikarita y'umutuku. AP Brera Strumica iri ku mwanya wa 8 muri shampiyona izasubira mu kibuga kuwa Gatatu ikina na Tikves.

Ku Cyumweru muri shampiyona y'icyiciro cya mbere muri Cyprus, ikipe ya AEL Limassol ikinamo Imanishimwe Emmanuel Manguende yatsinze Pafos ibitego 3-1.

Uyu myugariro w'Amavubi yabanje mu kibuga, gusa aza gusimbuzwa ku munota wa 62. AEL Limassol iri ku mwanya wa 5 muri shampiyona izasubira mu kibuga kuwa Gatandatu ikina na Omonia.

Muri shampiyona y'icyiciro cya kabiri muri Leta Zunze Ubumwe z'Amerika ku Cyumweru ikipe ya Rhode Island ikinamo Kwizera Jojea yatsinze FC Tulsa ibitego 2-1. Uyu mukinnyi w'Umunyarwanda yabanje mu kibuga ndetse ni nawe watanze umupira wavuyemo igitego cya 1.

Kugeza ubu Rhode Island FC iri ku mwanya wa 7 muri shampiyona ikaba izasubira mu kibuga ku Cyumweru ikina San Antonio.

Muri iyi shampiyona kandi ku Cyumweru ikipe ya One Knoxville ikinamo Nshuti Innocent yatsinzwe na Union Omaha igitego 1-0. Ntabwo uyu rutahizamu w'Amavubi yabanje mu kibuga ariko yinjiyemo asimbuye ku munota wa 64.

Kugeza ubu One Knoxville iri ku mwanya wa 5 ikaba izasubira mu kibuga ikina na Forward Madison FC.

Rwatubyaye Abdul weretswe ikarita y'umutuku ubwo ikipe ye ya AP Brera Strumica  yanganyaga na FK Rabotnički Skopje igitego 1-1