Umutungo wa Mark Zuckerberg wiyongereyeho arenga miliyari 70$ muri uyu mwaka

Kuva uyu mwaka wa 2024 watangira, Mark Zuckerberg niwe muherwe wabashije guca agahigo ko kongera umutungo we ku kigero cyo hejuru cyane.

Uwashinze akaba ari nawe muyobozi mukuru wa Sosiyete ya Meta, Mark Zuckerberg, yungutse arenga miliyari 70 z'amadolari muri uyu mwaka, bituma umutungo we utumbagira ugera kuri miliyari 198 z'amadolari nk'uko byemejwe na Bloomberg Billionaires Index.

Uku gutumbagira k'umutungo we kwatijwe umurindi n'umusaruro akesha ikoreshwa ry'imbuga nkoranyambaga ze zirimo Facebook, Instagram, WhatsApp na Threads.

Kugeza ubu, Zuckerberg ari ku mwanya wa gatatu ku rutonde rw'abantu bakize cyane ku isi, akaba abanzirizwa n'umuyobozi mukuru wa LVMH, Bernard Arnaud na Larry Ellison uyoboye Oracle.

Mark Zuckerberg w'imyaka 40 y'amavuko, yaciye aka gahigo ko kwinjiza agatubutse muri uyu mwaka asimbuye umuherwe Huang washinze ikigo cya Nvidia. Ibi, biramuha amahirwe yo gusoza umwaka ari we muntu wa mbere ukize cyane ku isi.

Mark Zuckerberg ni we muherwe umaze kwinjiza agatubutse muri uyu mwaka