Inama yafasha u Rwanda kugera ku cyerekezo 2050

Iki cyerekezo, kigabanyijemo  ibice bibiri, icya mbere gihera mu 2020 kikagera mu 2035 n’icya kabiri gihera mu 2036 kikagera mu 2050.

Intego u Rwanda rufite ni ukuba igihugu gifite ubukungu buteye imbere ku rugero ruringaniye (Upper Middle Income Country) mu 2035 no kuba igihugu gifite ubukungu buteye imbere cyane (High Income Country) mu 2050.

Mu 2035, umusaruro mbumbe w’imbere mu gihugu ubariwe ku muturage (amafaranga umuturage azaba yinjiza) uzaba urenze Amadolari ya Amerika 4.036; naho mu 2050 abe ari amadolari 12.476.

Banki y'Isi ivuga ko kugira ngo u Rwanda rugere ku cyerekezo 2050 bisaba kuzamura ubumenyi bw'abantu bari mu kigero cyo gukora, ibi bikaba bikubiye mu cyegeranyo cya 23 cyakozwe na Banki y’Isi ishami ry’u Rwanda ku ishusho y’ubukungu.

Ubusesenguzi bukubiye muri raporo ya 23 yakozwe na Banki y’Isi, ishami ry’u Rwanda ku ishusho y’ubukungu izwi nka “Rwanda Economic Update', igaragaza ko igihugu gikeneye gushyira imbaraga mu kwihutisha iterambere ry’ubumenyi mu rwego rwo kongera ubushobozi urwego rw’abikorera mu Rwanda.

Uhagarariye iyi Banki y’Isi mu Rwanda, Dr. Sahr John Kpundeh avuga ko ubu busesenguzi bwakozwe basanze igihugu kitagera ku iterambere ryifuzwa hatazamuwe intera y’ubumenyi u Rwanda rufite ubu.

Intego y’icyiciro cya Kabiri cya gahunda yo kwihutisha iterambere ni iyo guteza imbere ubumenyingiro ku buryo bitarenze mu 2029, NST 2, guhanga imirimo mishya hazaba hamaze guhangwa imirimo mishya 1.250.000.

Umunyamabanga wa Leta muri Minisiteri y’Uburezi, Claudette Irere avuga ko hari byinshi byakozwe mu cyiciro cya 1 cya gahunda y’igihugu yo kwihutisha iterambere NST 1 mu kuzamura ubumenyi nubwo bikomeje kuba intego no muri iyi imyaka 5 iri imbere.

Iyi raporo ishyirwa hanze nyuma y’amezi 6, ishingira ku mibare n’amakuru yakusanyijwe na Leta n’imibare iyi banki y’Isi yegeranya mu mikorere yayo ya buri munsi.

U Rwanda rufite intego yo kuzaba ruri mu bihugu 10 bya mbere birusha ibindi korohereza ishoramari mu 2035, rurashaka kandi kuzaba ruri mu bihugu 20 bya mbere bifite ubukungu buhagaze neza kurusha ibindi mu 2035 no mu bihugu 10 bya mbere ku Isi bikora neza mu rwego rw’ubukungu mu 2050.

Muri icyo gihe kandi impuzandengo y’izamuka ry’ubukungu (ibarirwa ku musaruro mbumbe w’imbere mu gihugu, GDP) igomba kuba nibura ku kigero cya 12% hagati ya 2018 na 2035 na 10% hagati ya 2036 na 2050.

Mu 2020, icyizere cyo kubaho mu Banyarwanda cyari imyaka 67,8, mu gihe mu 2035 byitezwe ko izaba ari 71,7 naho mu 2050 abe ari 73.

Umugore wo mu Rwanda azaba abarirwa abana batatu mu 2035 mu gihe mu 2050 azaba abarirwa kubyara abana babiri.

Ikigereranyo cy’ubushomeri mu baturage kizaba cyaravuye kuri 15,2% mu 2019 kigere kuri 7% mu 2035 na 5% mu 2050.