UEFA Champions League ya 2024/25 iratangirana n'imikino 2 ya nyuma

Abakunzi b'umupira w'amaguru cyane cyane wo ku mugabane w'Iburayi bari bamaze igihe kinini bategereje kongera kurara amajoro bareba imikino ya UEFA Champions League ihuza amakipe aba yarabaye aya mbere iwayo.

Nyuma y'uko taliki ya 29 z'ukwezi kwashize ari bwo habaye tombora, kuri uyu wa Kabiri taliki ya 17 Nzeri 2024 iyi mikino iratangira gukinwa mu buryo bushya. 

Saa kumi n'ebyiri n'iminota 45 ikipe ya Juventus yo mu Butaliyani iraba yakiriye PSV Eindhoven yo mu Butaliyani naho Young Boys yo mu Busuwisi iraba yakiriye Aston Villa yo mu Bwongereza.

Saa tatu z'ijoro ikipe ya AC Milan yo mu Butaliyani iraba yakiriye Liverpool yo mu Bwongereza, FC Bayern Munich yo mu Budage yakire Dinamo Zagreb yo muri Croatia, Real Madrid yakire VFB Stuttgart yo mu Budage naho Sporting CP yo muri Portugal yakire Lille yo mu Bufaransa.

Kuwa Gatatu Saa kumi n'ebyiri FC Bologna yo mu Butaliyani izakira Shakhtar Donetsk yo muri Ukraine naho Sparta Prague yo muri Repubilika ya Czech yakire FC Red Bull Salzburg yo muri Australia.

Saa tatu z'ijoro Celtic yo muri Scotland izakira Slovan Bratislava yo muri Slovakia, Club Brugge yo mu Bubiligi yakire Borussia Dortmund yo mu Budage, Manchester City yo mu Bwongereza yakire Inter Milan yo mu Butaliyani naho Paris Saint-Germain yo mu Bufaransa yakire Girona yo muri Espagne.

Kuwa Kane Saa kumi n'ebyiri n'iminota 45 Feyenoord yo mu Buhorandi izakira Bayer Leverkusen yo mu Budage naho FK Crvena Zvezda yo muri Serbia yakire Benfica yo muri Portugal.

Saa tatu z'ijoro Atalanta yo mu Butaliyani izakira Arsenal yo mu Bwongereza, Atletico Madrid yo muri Espagne yakire RB Leipzig yo mu Budage, Brest yo mu Bufaransa yakire Sturm Graz yo muri Australia naho Monaco yo mu Bufaransa yakire FC Barcelona yo muri Espagne.

Muri iyi mikino yo ku munsi wa mbere wa UEFA Champions League hazagaragaramo imikino ya nyuma yo muri 2004 na 2023. 

AC Milan iraba icakirana na Liverpool bahuriye ku mukino wa nyuma wa 2005 warangiye Liverpool ariyo yegukanye igikombe naho Manchester City ibe icakirana na Inter Milan bahuriye ku mukino wa nyuma wa 2023 bikarangira Manchester City ariyo yegukanye igikombe.

Iyi mikino izakinwa mu buryo bushya nyuma yuko amakipe avuye kuri 32 akagirwa 36. Nk'uko buri kipe yatomboye amakipe 8 ni nako izakina imikino 8 aho ine muri yo izayikinira mu rugo naho indi 4 ikayikinira hanze.

Nyuma yo gukina iyi mikino 8, muri rusange hangendewe ku manota, amakipe 8 ya mbere azahita abona itike ya 1/8 naho kuva ku ikipe ya 9 kugeza ku ya 24 zihure hagati yazo maze izitsinze izindi zihite nazo zerekeza muri 1/8.

AC Milan irakira Liverpool kuri uyu wa Kabiri 

Kuwa Gatatu Manchester City izakira Inter Milan