Benshi babyinnye intsinzi ! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri shampiyona y'icyiciro cya Mbere muri Kenya ,ku munsi w'ejo ku Cyumweru ikipe ya AFC Leopards ikinamo Gitego Arthur yatsinzwe na Posta Rangers igitego 1-0.

Ntabwo uyu rutahizamu w'Amavubi yabanje mu kibuga ariko yinjiyemo asimbuye ku munota wa 60. AFC Leopards iri ku mwanya wa 3, ikaba izasubira mu kibuga ku wa Gatandatu ikina na Bidco United.

Muri Libya ku munsi w'ejo ku Cyumweru ikipe ya Al Ahly Tripoli ikinamo Manzi Thierry yanganyije na Simba SC 0-0 mu mukino ubanza w'ijonjora rya Kabiri rya CAF Confederation Cup. 

Kuri uyu mukino uyu myugariro w'Amavubi yabanje mu kibuga ndetse arangiza n'umukino. Al Ahly Tripoli izasubira mu kibuga ku Cyumweru ikina na Simba SC mu mukino wo kwishyura.

Ku wa Gatandatu muri shampiyona y'icyiciro cya mbere muri Afurika y'Epfo, ikipe ya Kaizer Chiefs ikinamo Ntwari Fiacre yatsidaga Gallants ibitego 2-1.

Uyu munyezamu w'ikipe y'igihugu y'u Rwanda, Amavubi yari yabanje mu kibuga ku mukino we wa mbere ndetse yarangije umukino adasimbujwe. 

Kugeza ubu iyi kipe ya Kaizer Chiefs niyo iyoboye urutonde rwa shampiyona ikazasubira mu kibuga ku wa Kane w'icyumweru gitaha ikina na AmaZulu.

Muri shampiyona y'icyiciro cya kabiri muri Sweden,ku wa Gatandatu ikipe ya Sandvikens IF ikinamo Byiringiro League na Mukunzi Yannick yanganyije na Skovode AIK ibitego 2-2.

Kuri uyu mukino ntabwo yari yabanje mu kibuga gusa yinjiyemo asimbuye ku munota wa 77 naho Mukunzi Yannick we yagize ikibazo cy'imvune ndetse mu Cyumweru gishize yarabazwe.

Ikipe ya Sandvikens IF iri ku mwanya wa 3, ikazasubira mu kibuga ku wa Gatatu ikina na Orebro. Tukiri muri iyi shampiyona,ku munsi w'ejo ku Cyumweru ikipe ya Gefle IF ikinamo Rafael York yatsinzwe na Orgryte ibitego 3-2.

Uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Ikipe ya Gefle IF iri ku mwanya wa 14, ikazasubira mu kibuga ku Cyumweru ikina na Degerfors.

Muri shampiyona y'icyiciro cya Mbere mu Bubiligi,ku wa Gatanu ikipe ya Standard de Liege ikinamo Hakim Sahabo yatsindaga Dender ibitego 2-0.

Ntabwo uyu mukinnyi w'Umunyarwanda yari yabanje mu kibuga ndetse nta nubwo yari ku ntebe y'abasimbura. Kugeza ubu Standard de Liege iri ku mwanya wa 7, ikazasubira mu kibuga ikina na USG ku wa Gatanu w'iki Cyumweru.

Muri shampiyona y'icyiciro cya mbere muri Ukraine mu ikipe ya FC Kryvbas Kryvyi Rih ikinamo Bizimana Djihad ku munsi w'ejo ku Cyumweru yatsindaga ikipe yitwa Livyi Bereh igitego 1-0.

Kuri uyu mukino Kapiteni w'Amavubi yari yabanje mu kibuga ndetse nta nubwo yigeze asimbuzwa.

FC Kryvbas Kryvyi Rih iri ku mwanya wa 5 muri shampiyona, ikazasubira mu kibuga ku Cyumweru ikina na Vorskla.

Muri shampiyona y'icyiciro cya mbere muri Azerbaijani mu ikipe ya FC Zira ikinamo Mutsinzi Ange yatsindaga Neftci ibitego 2-0. Uyu myugariro w'Amavubi yari yabanje mu kibuga ndetse arangiza n'umukino.

Biteganyijwe ko FC Zira iri ku mwanya wa 5 muri shampiyona izasubira mu kibuga ikina na Sumqayit ku Cyumweru.

Muri shampiyona y'icyiciro cya mbere muri Macedonia mu ikipe ya AP Brera Strumica ikinamo Rwatubyaye Abdul, ku munsi w'ejo ku Cyumweru yatsindaga KF Besa Dobërdoll ibitego 3-2.

Ntabwo uyu myugariro yari yabanje mu kibuga ariko yinjiyemo asimbuye ku munota wa 46. AP Brera Strumica iri ku mwanya wa 6 muri shampiyona, ikazasubira mu kibuga ku wa Kane w'iki Cyumweru.

Muri shampiyona y'icyiciro cya mbere mu Buholandi, ku wa Gatandatu ikipe ya FC Groningen ikinamo Noam Merani yanganyaga na Feyenoord ibitego 2-2.

Uyu mukinnyi w'Umunyarwanda ntabwo yabanje mu kibuga ariko yinjiyemo asimbuye ku munota wa 82. FC Groningen iri ku mwanya wa 4 muri shampiyona, izasubira mu kibuga ikina na Hereenven ku Cyumweru.

Muri shampiyona y'icyiciro cya Kabiri muri Leta Zunze Ubumwe za Amerika, ku munsi w'ejo ku Cyumweru ikipe ya Rhode Island ikinamo Kwizera Jojea yatsindwaga na Orange County SC igitego 1-0. Ntabwo uyu mukinnyi w'Amavubi yari yabanje mu kibuga ariko yinjiyemo asimbuye ku munota wa 59.

Rhode Island iri ku mwanya wa 8 ikazasubira mu kibuga ku Cyumweru ikina na FC Tulsa.

Bizimana Djihad yafashaga ikipe ye ya FC Kryvbas Kryvyi Rih kubona intsinzi