Manchester United yanyagiye Southampton y'abakinnyi 10

Southampton yari yakiriye Manchester United mu mukino w'umunsi wa kane wa Shampiyona y'u Bwongereza English Premier League. Manchester United yifuzaga gutsinda uyu mukino kuko imikino itatu yari yabanje, iyi kipe ibarizwa kuri Old Trafford yatsinzwemo ibiri.

Southampton nayo yifuzaga gutsinda uyu mukino kuko imikino itatu ya mbere yose bari bayitsinzwe.

Abakinnyi babanje mu kibuga ku ruhande rwa Southampton, ni Southampton  Ramsdale, Sugawara, Bednarek, Stephens, Walker-Peters; Downes, Ugochukwu, Fernandes, Dibling; Archer, Brereton Diaz.

Abasimbura ba Southampton bari McCarthy, Harwood-Bellis, Taylor, Fraser, Lallana, Aribo, Cornet, Armstrong na Stewart.

Manchester United, yo mu bakinnyi yabanje mu kibuga, umutoza Eric Ten Hag yari yongeye kugirira ikizere umuzamu Onana, haza abakinnyi nka Mazraoui, De Ligt, Martinez, Dalot, Eriksen, Mainoo, Amad, Fernandes, Rashford na Jossua Zirkzee.

Abasimbura ba Manchester United bari Bayindir, Evans, Maguire, Casemiro, Collyer, Ugarte, Antony, Garnacho na  Wheatley.

Ni umukino Manchester United yatangiranye imbaraga zidasanzwe, gusa na Southampton ikanyuzamo ikataka. Ku munota wa 33, Southampton yabonye amahirwe ya Penaliti, nuko Cameron Archer ananirwa kuyinjiza mu izamu rya Andrea Onana.

Ibyo kurata Penaliti kwa Southampton, ntacyo byari bibwiye abakinnyi ba Manchester United, kuko ku munota wa 35, myugariro Matthijs de Ligt yafunguye amazamu, ku mupira yahawe na Bruno Fernandez.

Ku munota wa 41, Manchester United yari imeze neza, yabonye igitego cya kabiri, igitego cya Marcus Rashford, ku mupira yahawe na Amad Diallo, ibyo bitego aba ari nabyo isoza igice cya mbere.

Igice cya kabiri kikigaruka, Manchester United yagerageje kureba ko yatsinda ibitego byinshi, gusa Southampton yo izana gahunda yo kugarira.

Ku munota wa 79, Southampton yabonye ikarita itukura yahawe myugariro Jack Stephens, gusa Manchester United iguma kugorwa no kubona igitego cya gatatu muri ubwo bwugarizi bwari burimo icyuho.

Manchester United yagumye kotsa igitutu imbere y'izamu rya Southampton, nuko ku munota wa 90+6, Umunya Argentina Alejandro Garnacho abonera Manchester united igitego cya gatatu. Ibyo bitego bitatu ni nabyo byasoje umukino, nuko Mani U igira amanota atandatu. 

Manchester United ikomeje kugaragaza ko imbaraza zayo ari izo kwihisha mu dukipe duto, kuko imaze gutsindwa na Liverpool na Brighton and Hove Alibions, ikaba yarabashije gutsinda Fulham na Southampton. 

Manchester United yongeye kubona amanota atatu imbere ya Southampton 

Manchester United ikomeje gucungira ku makipe aciriritse cyane ikaba ariyo itsinda 

Alejandro Garnacho yafashije Manchester United kubona igitego cya gatatu