Basketball: Impamvu Sagamba wa Patriots BBC ari umukinnyi wo kwitega mu mikino ya nyuma ya shampiyona

Ku mugoroba wo kuri uyu wa Gatatu, muri BK Arena haratangira imikino ya nyuma ya BetPawa Playoffs muri Shampiyona y'u Rwanda muri Basketball. Ni imikino izahuza APR BBC na Patriots BBC. 

Patriots BBC ifite amahirwe yo kwitwara neza kuko inafite umukinnyi ufite amateka meza muri iyi mikino ari we Sagamba Sedar. 

Sagamba Sedar ukinira Patriots BBC, kuri uyu wa 11 Nzeli araza kuba akina ku nshuro ya 7 imikino ya nyuma ya Kamarampaka. Ibi yabigezeho mu myaka ya 2017, 2018, 2019, 2020, 2021, 2022 ndetse n'uyu wa 2024.

Mu nshuro 6 ziheruka akina iyi mikino ya nyuma ya Playoffs, yabashije gutwaramo ibikombe inshuro 3 muri 2018, 2019 na 2020. Sedar kandi yatsindiwe ku mukino wa nyuma inshuro 3 arizo 2017, 2021 na 2022. 

Sedar Sagamba yanyuze mu makipe yo muri Uganda arimo; Saint Lawrence University team, Sharing Basketball Club, Warriors  mbere y'uko yerekeza muri Ndejje University Basketball ari naho yavuye ubwo yazaga muri Patriots BBC mu Ugushyingo 2016.

Sagamba Sedar, umwe mu bakinnyi bo kwitega ku ruhande rwa Patriots BBC