Alex Muhangi ategerejwe mu gitaramo cyo kwagura imikoranire n’abanyarwenya b’i Kigali

Ni ubwa mbere uyu munyarwenya agiye gutaramira abanya-Kigali binyuze muri ibi bitaramo bisanzwe bibera muri Kigali Conference and Exhibition Village ahazwi nka Camp Kigali. Kuri iyi nshuro bizaba ku wa Kane tariki 19 Nzeri 2024, aho kwinjira ari 5000Frw mu myanya isanzwe na 10000 Frw muri VIP.

Fally Merci usanzwe utegura ibi bitaramo yabwiye InyaRwanda, ko batumiye Muhangi kubera ubufatanye bagiranye, bugamije gufasha abanyarwenya bo mu Rwanda kujya bagaragara mu bitaramo bye akorera muri Uganda.

Banemeranyije uburyo abanyarwenya bo muri Uganda asanzwe akorana nabo bajya bataramira i Kigali nabo binyuze muri ibi bitaramo bya Gen-Z Comedy.

Ati “Turi mu biganiro bigamije kwagura umuvano n’abavandimwe bo mu Karere k’Afurika y’Iburasirazuba (EAC) ari nayo mpamvu twahereye kuri Alex Muhangi, ku buryo abanyarwenya bacu bajya bajyayo mu rwego rwo kwagura umubare w’abazi ibihangano byabo.”

Akomeza ati “Twaganiriye ku kuntu abanyura muri Gen-Z Comedy nabo bajya batumirwa gukorera ibitaramo muri Uganda, cyane cyane mu bitaramo asanzwe ategura.”

Muri Kamena 2024, Alex Muhangi yaje i Kigali yitabiriye kureba imikino ya BAL yabereye muri BK Arena. Icyo gihe, mbere yo gusubira muri Uganda, yahuye kandi agirana ibiganiro na Fally Merci byagarutse ku mikoranire irambye mu guteza imbere urwenya rwa ‘Comedy’.

Yifashishije konti ye ya Instagram, Muhangi yanditse agira ati “Uyu munsi nahuye n’umuyobozi wa Gen-Z Comedy Fally Merci], umusore muto ariko w’umuhanga. Muvandimwe imbere ni heza.”

Muhangi asanzwe ategura ibitaramo bya ‘Comedy Store’ muri Uganda, binyuramo abanyarwenya bakomeye, ndetse hatumirwa n’abahanzi banyuranye bagataramira abantu. 

Mu 2016 na 2017, ikinyamakuru New Vision cyatangaje Alex Muhangi nk’umunyarwenya w’ikitegererezo muri iriya myaka, kandi nk’umunyarwenya ukora ibizwi nka ‘Standup Comedy’ yisunze ururimi rw’icyongereza.

Uyu musore yakoreye ibitaramo bikomeye muri Afurika y’Epfo, Zambia, Malawi, Zimbabwe, Sudan y’Epfo, Kenya, Tanzania, Rwanda, Canada, Australia, Somalia, u Bwongereza, u Budage, Norway, Sweden, Nigeria, Ghana, Turkey, UAE, u Bushinwa n’ahandi.

Yabaye umunyamakuru wa Radio Rukungiri yumvikanira kuri 96.9 Fm ndetse na Vision FM Mbarara yumvikanira kuri 89.1 Fm. Mu rugendo rwe amaze gukorana n’abanyarwenya bakomeye barimo Anne Kansiime, Daniel Ndambuki, Teacher Mpamire, Eric Omondi, Akite Agnes n’abandi.

 

Alex Muhangi agiye gutaramira i Kigali binyuze mu bitaramo bya Gen-Z Comedy

 

Muri Kamena 2024, Alex Muhangi yaje i Kigali agirana ibiganiro na Fally Merci byagejeje ku kuba bazajya bakorana mu gufasa abanyarwenya gutaramira i Kigali no muri Uganda