Ruhango: Umusore w'imyaka 34 yishwe n'inkoni azira ibikombe bibiri by'igikoma

Maniragaba Alfred w’Imyaka 34 y’amavuko wari utuye mu Mudugudu wa Nyacyonga, Akagari ka Kebero, Umurenge wa Ntongwe mu Karere ka Ruhango, biravugwa ko yatonganye n’umuvandimwe we bapfa igikoma aramukubita kugeza ubwo ajyanwe kwa muganga agahita apfa.

Abaturage baturanye na nyakwigendera bavuze ko uyu Maniragaba Alfred yasutse igikoma abandi batari banywa arongera ariyongeza abandi batari batangira kunywa agiye kwiyongera ubugira kabiri barumuna be baramwahuka baramudiha.

Nyamara n’ubwo intandaro yo gukubitwa ari igikoma, Umukuru w’Umudugudu wa Nyacyonga Hatagekimana Zabulon avuga ko  byahereye ku makimbirane babanje kugirana n’Umubyeyi we ndetse n’abo bavandimwe ashingiye ku murima yashakaga kugurisha bawitambika imbere.

Ati “Intonganya zatangiriye kuri uwo murima zikomereza mu rugo kuko Maniraguha yiyongeje igikoma intambara ihera ubwo baramukubita kugeza apfuye.”

Umukuru w’Umudugudu yavuze ko ubwo Alfred yiyongezaga igikoma ku nshuro ya kabiri, murumuna we witwa Akili Niyomwungeri yafashe itaka arimena muri icyo gikoma hanyuma rurambikana niko kwishyira hamwe baramuhondagura.

Maniraguha Alfred akimara gukubitwa yajyanywe mu Bitaro bya Kaminuza bya Butare (CHUB) aba ariho ashiriramo umwuka. Umurambo wa Maniraguha Alfred wajyanywe mu Bitaro bya Polisi ku Kacyiru gukorerwa isuzuma.