Ahabanza Imikino

Erling Haaland yafashije Man City gutsinda West Ham no kwegukana umwanya wa mbere

Yanditswe na: ISHIMWE Walter
Taliki:31/08/2024 20:59 0

Manchester City yabonye intsinzi ya gatatu nyuma yo gutsinda West Ham United, Umunya Noruveje Erling Haaland akomeza kugaragaza ubuhanga budasanzwe mu gutsinda ibitego.

Abakinnyi babanje mu kibuga ku ruhande rwa West Ham ni Areola, Wan-Bissaka, Mavropanos, Kilman, Emerson, Alvarez, Paqueta, Rodriguez, Kudus, Antonio na Bowen.

Abasimbura wa West Ham United bari Fabianski, Casey, Coufal, Todibo, Soucek, Irving, Summerville, Guilherme na Fullkrug.

Ku ruhande rwa Manchester City, abakinnyi babanje mu kibuga ku ni Ederson, Lewis, Akanji, Dias, Gvardiol, Kovacic, De Bruyne, Bernardo, Doku, Grealish, Haaland.

Abasimbura ba Manchester City bari Ortega Moreno, Walker, Stones, Ake, Rodri, Gundogan, Nunes, O’Reilly na James McAtee.

Ni umukino Manchester City yatangiranye imbaraga zidasanzwe kuko ku munota wa 10, rutahizamu ukomoka muri Noruveje Erling Haaland yafunguye amazamu ku mupira yahawe na Bernaldo Silva.

Ku munota wa 19, West Ham United yabonye igitego cyo kwishyura, cyitsinzwe na myugariro wa Manchester City Ruben Diaz.

Ku munota wa 30, Erling Haaland yongeye gutsindira Manchester City igitego cya kabiri, agitsinda ku mupira yahawe na myugariro Rico Lewis.

Igitego Haaland yatsinze ku munota wa 30, ni na cyo cyasoje igice cya mbere cyarangiye ari ibitego bibiri bya Manchester City kuri kimwe cya West Ham United.

Mu gice cya kabiri, Manchester City yagumye kubura igitego cya gatatu cy'umutekano, mu gihe West Ham United yari iri gukora iyo bwabaga ngo yishyure igitego cya kabiri.

Ku munota wa 83, Erling Haaland wari umaze neza muri uyu mukino, yatsinze igitego cya gatatu cyashimangiye intsinzi ya Manchester City.

Gutsinda uyu mukino byatumye Manchester City igira amanota icyenda, ifata umwanya wa mbere, dore ko Arsenal na Brighton zo zaguye miswi, zikaba zasigaye ku manota arindwi.

Mu yindi mikino yabaye kuri uyu wa Gatandatu, Arsenal yaguye miswi na Brighton 1-1, Brentford itsinda Southampton 3-1, Bournemouth itsinda Everton 3-2, Ipswich Toun igwa miswi na Fulham 1-1, Aston Villa itsinda Leicester City 2-1 naho Nottingham Forest igwa miswi na Wolves 1-1.