Ahabanza Imikino

Premier League: Liverpool yatsikiye, Man United yinyara mu isunzu naho Man City ikomeza kwandika amateka

Yanditswe na: ISHIMWE Walter
Taliki:14/09/2024 19:14 0

Ubwo imikino ya shampiyona y'u Bwongereza yakomezaga kuri uyu wa Gatandatu, Liverpool yatsinzwe na Nottingham Forest, Manchester City itsinda Brentford.

Umukino wahuje Liverpool na Nottingham Forest, wabereye ku kibuga cya Liverpool cya Anfield Road. Liverpool yashakaga gutsinda cyane ko imikino itatu ya mbere yari yayitsinze yose, bikaba byayihaga amahirwe yo kuguma kurwanira igikombe idatsindwa.

Ibyo abakunzi ba Liverpool batekerezaga, si ko byagenze kuko ku munota wa 72, Callum Hudson-Odoi wahoze muri Chelsea yatsindiye Nottingham Forest igitego ku mupira yahawe na Anthony Elanga wahoze muri Manchester United.

Igitego cya Callum Hudson-Odoi ni na cyo cyatandukanyije Liverpool na Nottingham Forest, nuko amanota y'umukino wa kane yanga gutaha mu mujyi wa Liverpool.

Kera kabaye, Manchester United yongeye kubona amanota atatu, iyakura imbere y'ikipe ya Southampton yari iri gukina ari abakinnyi 10 kubera ikarita itukura yabonye mu mukino. Mani U yatsinze Southampton ibitego 3-0, bikaba byatsinzwe na Matthjs de Ligt ku munota wa 35', Marcus Rashford ku munota wa 41 na Alejandro Garnacho ku munota wa 90+6'.

Liverpool yatsinzwe na Nottingham Forest igitego kimwe ku busa

Igitego cya Nottingham Forest cyatsinzwe na Callum Hudson-Odoi wahoze muri Chelsea

Uretse umukino wa Liverpool na Nottingham Forest, na Manchester City yari yakiriye Brentford kuri Etihad Stadium. Ni umukino watangiye Brentford itsinda igitego cya mbere ku munota wa mbere, igitego cyatsinzwe na Youan Wissa, Mani City iba atangiranye igitutu cyo kwishyura.

Manchester City, byayitwaye iminota 18 kugira ngo Erling Haaland ayibonere igitego cyo kwishyura. Ku munota wa 32 Erling Haaland yatsindiye Manchester City igitego cya kabiri.

Igitego cya kabiri cya Erling Haaland ni na cyo cyasoje umukino warangiye ari ibitego bibiri bya Manchester City kuri kimwe cya Brentford.

Gutsinda uyu mukino ku ruhande rwa Manchester City byatumye igira amanota 12 mu mikino ine imaze gukina, kugeza ubu nta nota na rimwe iyi kipe iratakaza.