Ahabanza Imikino

Laliga: FC Barcelona yabonye intsinzi ya kane nyuma yo guha isomo Real Valladolid

Yanditswe na: ISHIMWE Walter
Taliki:31/08/2024 19:49 0

Kuri uyu wa Gatandatu, FC Barcelona yatsinze umukino wa kane wikurikiranya muri Shampiyona ya Esipagne "Laliga", itsinda Real Valadolid ibitego 7-0, ikomeza guca amarenga ko uyu mwaka ushobora kuzayibera mwiza.

Ni umukino FC Barcelona yakinnye iri imbere y'abafana bayo. Abakinnyi babanje mu kibuga ku ruhande rwa FC Barcelona ni Ter Stegen; Koundé, Cubarsí, Iñigo, Balde; Casadó, Pedri, Olmo; Raphinha, Lewandowski na Lamine Yamal.

Ku ruhande rwa Real Valladolid's, abakinnyi babanje mu kibuga ni Hein, Luis Pérez, Cömert, Javi Sánchez, Rosa; Juric, Kike Pérez, Amallah; Iván Sánchez, Moro na Marcos André.

Muri uyu mukino FC Barcelona yatangiranye imbaraga zidasanzwe, nuko ku munota wa 20 gusa, Raphinha afungura amazamu ku mupira yahawe na Pau Cubas.

Nyuma y'iminota ine gusa, Robert Lewandowski yatsindiye FC Barcelona igitego cya kabiri ku munota wa 24, agitsinda ku mupira yahawe na Lamine Yamal.

Ubwo igice cya mbere cyari kiri hafi kurangira, ku munota wa 45+2, myugariro Jules Kounde yatsindiye FC Barcelona igitego cya gatatu, nuko amakipe yombi ajya kuruhuka FC Barcelona iyoboye n'ibitego bitatu ku busa bwa Real Valladolid.

Mu gice cya kabiri, FC Barcelona yagarukanye imbaraga, nuko ku munota wa 64, Raphinha ayitsindira igitego cya kane ku mupira yahawe na Robert Lewandowski. Ku munota wa 72, Raphinha wari umeze neza cyane yatsindiye FC Barcelona igitego cya gatanu, ku mupira yahawe na Lamine Yamal.

Gutsinda ibitego bitanu kuri FC Barcelona, ntabwo byari bihagije kuko ku munota wa 82 Dani Olmo yatsinze igitego cya Gatandatu ku mupira yahawe na Ferran Torres. Ku munota wa 85 Ferran Torres nawe yatsindiye FC Barcelona igitego cya karindwi ku mupira yahawe na Raphinha.

Ibitego birindwi bya FC Barcelona ni na byo byasoje umukino, nuko ihita igira amanota 12, itangira gutanga ubutumwa ko ishaka igikombe uyu mwaka.