Yanga SC yegukanye Ngao ya Jamii inyagiye Azam FC itegerejwe na APR FC

Ni mu mukino wa nyuma w'iki gikombe wabaye kuri iki Cyumweru Saa Kumi n'Ebyiri zuzuye ubera kuri Uwanja wa Mkapa. 

Muri Tanzania iki gikombe gikinwa n'amakipe 4 yabaye aya mbere muri shampiyona ubundi izitsindanye zikagera ku mukino wa nyuma. 

Yanga SC yegukanye igikombe cya shampiyona yari yatsinze Simba SC yabaye iya 3 igitego 1-0 naho Azam FC yabaye iya 2 itsinda Coastal Union yabaye iya 4 ibitego 5-2. 

Byari byitezwe ko ku mukino wa nyuma ikipe ya Yanga SC ariyo izegukana igikombe ndetse ni nako byaje kugenda ibikora itsinda Azam FC ibitego 4-1.

Ni ibitego bya na Prince Dube ku munota wa 19, Yoro Diaby witsinze ku wa 28, Aziz Ki ku wa 31 ndetse na Clement Mzize ku wa 90+2 mu gihe 1 cya Azam FC cyo cyatsinzwe na Fei Toto.

Iyi kipe ya Azam FC yanyagiwe na Yanga SC itegerejwe na APR FC mu mukino w'ijonjora ry'ibanze rya CAF Champions League, aho umukino ubanza uzakinwa tariki 18 Kanama 2024 kuri AZAM Complex Stadium naho uwo kwishyura ugakinwa tariki ya 25 kuri Stade Amahoro.

Nubwo iyi kipe yatsinzwe ariko na APR FC nayo ku munsi w'ejo yatsinzwe na Police FC ku gikombe nacyo kiruta ibindi mu Rwanda.

Abakinnyi ba Yanga SC bishimira cya Prince Dube 

Aziz Ki yishimira igitego yatsinze 

Azam FC itegerejwe na APR FC yanyagiwe na Yanga SC