Umuhanzi wakunzwe cyane mu ndirimbo zubakiye ku rukundo, Umutare Gaby ndetse na Manzi Dbest wamenyekanye mu ndirimbo zirimo nka ‘Your side’ bategerejwe mu Mujyi wa Brisbane mu gihugu cya Australia mu gitaramo kigamije kwizihiza intsinzi.
Iki gitaramo cyiswe “East African Party” kigiye kuba
ku nshuro, aho gihurijemo abahanzi b’abanyarwanda basanzwe bakorera umuziki
muri Australia.
Ni igitaramo kizaba ku wa 31 Kanama 2024, guhera saa
kumi n’imwe z’umugoroba kugeza saa saba z’ijoro. Cyahujwe no kwizihiza no
kwishimira intsinzi ya Perezida Paul Kagame uherutse gutorerwa kongera kuyobora
u Rwanda muri manda y’imyaka itanu iri imbere.
Ariko kandi abazakitabira bazagira n’umwanya wo
kwizihiza Umuganura ndetse no kwibohora. Abategura iki gitaramo bagaragaje ko
kizarangwa kandi n’umuziki wubakiye ku njyana ya Afrobeat, Amapiano, Drill,
Dancehall, RnB, Afrogako n’izindi zinyuranye.
Kandi kizaririmbamo abahanzi nka Umutare Gaby, Manzi DBest,
Joy Key ndetse na Aidan T-Kay. Kizabera muri Queenslanda muri Brisbane, umujyi
utuwe n’abanyarwanda benshi ndetse n’abandi bo mu bihugu byo mu Karere k’Afurika
y’Iburasirazuba.
Manzi DBest yabwiye InyaRwanda ko bateguye iki
gitaramo bagamije kwizihiza intsinzi ya Perezida Paul Kagame. Ati “Tugiye
gukora igitaramo kizahuza abanyarwanda n’abandi batuye muri iki gihugu,
hagamijwe kwizihiza intsinzi y’Umukuru w’Igihugu, twe nk’abanyarwanda batuye
muri iki gihugu, tumufata nka Perezida wa Afurika, kubera ko ibikorwa bye
birigaragaza.”
“Ni muri urwo rwego rero twateguye iki gitaramo
tukabihuza n’igitaramo gisanzwe kibera hano kizwi nka ‘East Party Festival’,
kandi tuzanihiza Umunsi w’Umuganura, n’Umunsi w’Intwali. Ni igitaramo kimwe,
rero nzaririmbamo, ndi kumwe na Umutare Gaby n’abandi.”
Manzi DBest yagiye agira amahirwe yo kuririmba mu bitaramo bikomeye byatumye ahurira ku rubyiniro n’abarimo Harmonize, Koffi Olomide, Jose Chameleone n’abandi.
Yavuze ko kuba agiye guhurira ku rubyiniro na Umutare
Gaby ni ‘ibintu by’agaciro kanini cyane kuri njye, kuko mufata nka Mukuru
wanjye’. Akomeza ati “Yagiye amfasha cyane mu bikorwa byanjye by’umuziki,
yagiye angira inama cyane buri munsi, rero kuri iyi nshuro tugiye guhuza
imbaraga muri ‘East African Party’.
Manzi yavuze ko iki gitaramo kizaba umwanya mwiza wo
kugaragaza ko abanyarwanda batuye muri Australia bashyize hamwe, kandi bakomeje
urugendo rwo kwiteza imbere. Ati “Intego yacu ni ukugaragaza umuco nyarwanda,
no kugirango ibindi bihugu bimenye ibyo dukora, bibakangarurira kumva ko basura
u Rwanda mu bihe bitandukanye.”
Kwinjira muri iki gitaramo ni amadorali 50 mu myanya
isanzwe n’amadorali 70 mu myanya y’icyubahiro (VIP).
Manzi Dbest yaherukaga gusohora amashusho y'indirimbo
'So Funny' yabanjirijwe n'indirimbo z'irimo 'Ndimoneza' yakoranye n'abarimo
Jowest, Khalfan, Papa Cyangwe, The Nature na Manick Yani. Anafite indirimbo zirimo 'Your Side' yakoranye
na Afrique, 'Mitungi', 'Party' n'izindi.
Ni mu gihe Umutare Gaby aherutse gushyira hanze indirimbo
zirimo 'Juru', 'Umuntu, 'Urangora', 'Ntawundi', 'Ntunkangure', 'Messa kamwe'
n'izindi zinyuranye.
Manzi DBest agiye kuririmba muri iki gitaramo, nyuma y’uko
ku wa 19 Nyakanga 2024 yakoze igitaramo cye bwite yahurijemo abahanzi banyuranye,
cyabereye muri Canbera, umujyi Mukuru wa Australia. Ni igitaramo yahuriyemo n’abahanzi
bashya bo muri kiriya gihugu n’abandi.
Umutare Gaby agiye gutaramira muri Australia mu rwego
rwo kwizihiza Intsinzi ya Perezida Paul Kagame
Manzi Dbest yavuze ko bateguye iki gitaramo bagamije
gufasha Abanyarwanda n’abandi batuye muri kiriya gihugu kwizihiza Umuganura
ndetse no Kwibohora
Iki gitaramo kizaba ku wa 31 Kanama 2024, kandi kizaririmbamo abahanzi basanzwe batuye muri kiriya gihugu
Manzi amaze gutaramana n'abahanzi bakomeye barimo nka Chameleone, Harmonize n'abandi
Manzi yavuze ko mbere y'iki gitaramo azashyira hanze indirimbo y'urukundo
Muri Nzeri 2023, Umutare Gaby yagiriye uruzinduko mu Rwanda
KANDA HANO UREBE AMASHUSHO Y’INDIRIMBO ‘SO FUNNY’ YA MANZI DBEST
TANGA IGITECYEREZO