Mr Kagame yasobanuye Album yitiriye indirimbo yahawe na Bruce Melodie ku buntu - VIDEO

Mr Kagame yabwiye InyaRwanda ko amaze imyaka ibiri akora kuri iyi Album izaba iriho indirimbo 15 zigaruka ku rukundo n’ubuzima busanzwe. Ndetse izumvikanaho umwimerere w’injyana ya Rap nk’uko uyu muraperi abyemeza.

Ni Album avuga ko idasanzwe mu rugendo rwe rw’umuziki. Kuko yayitiriye indirimbo yashatse kugurira Bruce Melodie mu 2018 amuhaye Miliyoni 1 Frw, undi akabyanga.

Yavuze ko yakomeje kugerageza asaba Bruce Melodie kumuha iriya ndirimbo, kugeza ubwo mu 2022 yayimuhereye ubuntu. Ati "Holybeat yakoze iyi ndirimbo mu 2018 ayikorera Bruce Melodie.

Icyo gihe rero nib wo nakoranaga na Jimmy iriya ndirimbo turayikunda, narayikunze pe! Birangira dushatse kuyigura (Kuri Miliyoni 1 Frw) kwa Bruce arabyanga, abyanze hacamo igihe duhura mu 2022, ndamubwira nti ariko wampaye iyo ndirimbo, birangira abyemeye.”

“Urumva rero yayimpaye mu 2022 ari na bwo nayisubiyemo, icyo gihe nafatanyije na Producer Rush. Bitewe n'uko rero nakunze iyi ndirimbo ni yo mpamvu nayitiriye Album.”

Ibi byatumye iyi ndirimbo iba iya mbere Mr Kagame agiye gushyira atiyandikiye, kuko izindi ndirimbo zose yashyize hanze ariwe waziyandikiye, ni mu gihe iriya ‘Amakashi’ yakozwe na Bruce Melodie afatanyije na Producer Holybeat usigaye abarizwa muri Canada n’umuryango we muri iki gihe.

Iyi ndirimbo ‘Amakashi’ Bruce Melodie yari yayikoze ayikorewe na Producer Holybeat mu buryo bw’amajwi. Mr Kagame ati “Iyi ndirimbo ntisanzwe kuri njye, kuko yakozwe kuva mu 2018.”

Iyi Album yise ‘Amakashi’ iriho indirimbo yakoranyeho n’abahanzi bo mu Rwanda ndetse n’abo mu Karere ka Afurika y’Uburasirazuba. Ndetse, Mr Kagame avuga ko yatangiye kuyikoraho kuva mu Ukuboza 2022, akomeza kuyinononsora.

Kagame yavuze ko iyi ndirimbo ‘Amakashi’ yitiriye Album, igiye kujya hanze mbere y’uko asohora iyi Album ku mbuga zitandukanye zicururizwaho umuziki.

Mr Kagame yatangaje ko agiye gusohora Album ya Kabiri yitiriye indirimbo yahawe na Bruce Melodie

Mr Kagame yavuze ko album ye iriho indirimbo 15 zirimo izo yakoranye n’abahanzi bo mu Rwanda n’abo mu mahanga

Mr Kagame yamenyekanye cyane binyuze mu ndirimbo zirimo nka ‘Ntimubimbaze’, ‘Mpa power’ n'izindi 

Indirimbo 'Amakashi' yakozwe na Bruce Melodie mu 2018, mu 2022 ayegurira Mr Kagame 

KANDA HANO UREBE AMASHUSHO Y’INDIRIMBO ‘IRAHAMBAYE’ YA MR KAGAME