Ibyo wamenya ku mutoza mushya uri butangazwe vuba na APR FC

Kuwa Mbere, ikipe y'Ingabo z'igihugu ya APR FC ibinyujije ku mbuga nkoranyambaga zayo yavuze ko vuba iratangaza umutoza mukuru mushya gusa isaba abantu kuba maso kuri 'application' yayo kuko ariho izamutangariza.

Kuri ubu amakuru avuga ko uyu mutoza ari uwitwa Darko Novic wavutse taliki 28 Mata mu 1972 akavukira ahitwa Zrenjanin muri Serbia.

Uyu mugabo w'imyaka 52 yatangiye akina ruhago akinira amakipe arimo FK Obilic y'iwabo muri Serbia, muri 2000 afata umwanzuro wo gusezera kuri ruhago burundu. Nyuma yaho yahise yinjira mu mwuga w'ubutoza ahereye mu ikipe y'abato ya FK Obilic yari yaranakiniye.

Muri 2006 Darko Novic yagiye kuba umutoza wungirije mu ikipe ya Al-Ittihad SCS yo muri Libya, ahamara imyaka 3, muri 2008 ajya gutoza ikipe y'igihugu ya Libya yamazemo imyaka 3.

Muri 2012 yaje gusubira muri Al-Ittihad SCS gusa noneho atari umutoza ahubwo ashinzwe gushaka abakinnyi ariko ntiyahatinda. Yakomeje atoza amakipe arimo Al-Madina Tripoli, Heilongjiang Ice City, Hefei Guiguan mbere yuko asubira mu ikipe y'Igihugu ya Libya muri 2017 akayivamo muri 2020.

Guhera muri 2020 yatoje amakipe arimo Al-Shamal SC yo muri Qatar, Al-Batin FC yo muri Arabia Saudite, ES Sétif yo muri Algeria na US Monastir yo muri Tunisia yatoje umwaka umwe muri 2022.

Ubwo yanatozaga iyi kipe yahuye na APR FC mu mikino ya CAF Champions League imutsindira igitego 1-0 i Huye avuga ko nubwo batishimiye imisifurire y’umukino wayihuje na APR FC, ngo ntacyo yayivugaho kuko ashobora kubihanirwa n’Impuzamashyirahamwe y’Umupira w’Amaguru muri Afurika (CAF).

Mu mwaka ushize w'imikino, Darko Novic yatozaga ikipe ya Al-Bukiryah FC ikina shampiyona y'icyiciro cya kabiri muri Arabia Saudite gusa akaba yatandukanye nayo mu kwezi kwa 2 kuyu mwaka. Uyu mutoza afite 'License' ya UEFA Pro akaba akunze guhagarika abakinnyi mu kibuga mu buryo bwa 4-3-3.

Darko Novic ni we mutoza mushya wa APR FC