Menya ibyiciro byihariye bizatorwa n’abagize inteko zizatora mu matora y’Abadepite yo muri Nyakanga

Kuri uyu wa Kane tariki 6 Kamena 2024, nibwo Komisiyo y'Igihugu y'Amatora (NEC) yatangaje ibyiciro byihariye bizatorerwa ku wa 16 Nyakanga n’abagize inteko zizatora muri ibyo byiciro.

Muri ibi byiciro byihariye, harimo icyiciro cy’abagore, icy’urubyiruko n’icy’abafite ubumuga.

Inteko itora Abadepite 24 b’abagore batorerwa muri buri Ntara n’Umujyi wa Kigali igizwe n’abagize Komite Nyobozi y’Inama y’Igihugu y’Abagore, abagize Inama Njyanama z’Imirenge igize ifasi y’itora, ndetse n’abagize Inama Njyanama z’Uturere tugize Intara.

Abagize Inteko itora Umudepite uhagararira abafite ubumuga harimo abagize Komite Nyobozi y’Inama y’Igihugu y’abantu bafite ubumuga ku rwego rw’Igihugu, ku rwego rw’Intara n’Umujyi wa Kigali, ku rwego rw’Akarere n’Umuhuzabikorwa w’Inama y’Igihugu y’Abantu bafite ubumuga ku rwego rw’Umurenge.

Hatangajwe kandi ko Inteko itora Abadepite babiri bahagararira urubyiruko igizwe na Komite Nyobozi y’Inama y’Igihugu y’Urubyiruko ku rwego rwa buri Karere ndetse na Komite ku rwego rw’Igihugu.

Uko gahunda y’aya matora iteye, abanyarwanda baba mu mahanga nibo bazabanza gutora Abadepite ku ya 14 Nyakanga 2024, hakurikireho abatuye imbere mu gihugu ku ya 15 Nyakanga, hasoze ab’ibyiciro byihariye bazatora tariki 16 Nyakanga.

Ibi byiciro bigiye ahagaragara nyuma y’uko hatangajwe urutonde rw'Abakandida bemejwe by'agateganyo mu matora y'Abadepite. 

NEC yatangaje ko abantu 23 aribo bujuje ibisabwa ku mwanya w'Abadepite babiri bahagararira urubyiruko mu Nteko. Mu byo basabwaga harimo gutanga Gutanga Kopi y'Indangamuntu, 'Criminal Record', 'Inyandiko y'Ukuri', Icyemezo cya muganga', 'Icyemezo cya Komisiyo' n'ibindi.

Ni mu gihe kandi Umuyobozi w'iyi Komisiyo, Oda Gasingizwa yavuze ko abajuje ibisabwa bemerewe guhatanira ku mwanya w'Umukuru w'Igihugu, ari Kagame Paul watanzwe n'umuryango FPR Inkotanyi, Habineza Frank watanzwe n'Ishyaka Green Party ndetse na Mpayimana Philippe, umukandida wigenga.

Komisiyo y'Igihugu y'Amatora, NEC yatangaje ibyiciro byihariye n'abagize inteko zizatora mu matora y'Abadepite azaba muri Nyakanga 2024