Ross Kana yerekeje muri Ethiopia

Kuri uyu wa Kabiri tariki 04 Kamena 2024, ni bwo Ross Kana wakunzwe cyane mu ndirimbo yise ‘Sesa’ yerekeje ku Kibuga mpuzamahanga cy'indege cya Kanombe, aho yafashe rutemikirere imwerekeza mu gihugu cya Ethiopia muri gahunda zirimo iza muzika ndetse n’ize ku giti cye. Biteganijwe ko azamarayo ibyumweru bitatu.

Ross Kana yakomoje ku ndirimbo za bagenzi be bahuriye muri Label, Element wamaze gushyira hanze indirimbo yise ‘Milele’ ndetse na Bruce Melodie witegura gushyira ahagaragara ‘Soweto,’ avuga ko ari indirimbo nziza cyane, anaboneraho kuvuga ku mishinga ari gutegura ku ruhande rwe.

Yagize ati: “Njyewe rero ndi umwe mu bapeti batagira igitutu. Nta gitutu ngira kubera ko ibintu mba ndi gukora ndabitegura nkabitanga. Rero iyo mbitanze, ntabwo nshobora kuvuga ngo runaka kuko yasohoye, ngo njyewe ngire icyo gitutu. Ipiganwa mfite ntabwo ari iryo gukora ibintu byinshi ahubwo ni iryo gukora ibintu byiza.”

Uyu muhanzi yumvikanishije ko kuba atari gusohora indirimbo atari uko nta ziharihari ahubwo ari uko ari gutegura ibintu byiza kandi bizwi ko ibyiza bisaba umwanya uhagije.

Ati: “Ndimo gutegura ibintu byiza, byiza cyane.”

Yashimangiye ko kuba ari ku isoko rimwe n’abandi bahanzi bakomeye nta mpungenge bimuteye kuko yinjira mu muziki yari asanzwe abizi ko bazahahurira, avuga ko ashaka gukora ibintu bye ntawe agendeyeho.

Ross Kana yavuze ko nta na rimwe mu buzima bwe azigera akorera ku gitutu ngo bitumen atanga ibintu bidashyitse. Yasobanuye ko umuziki we azwukora neza yitonze atitaye ku bivugwa ku buryo nashyira hanze indirimbo izaba inogeye amatwi ya buri wese.

Yatangaje ko mu minsi iri imbere azavuga birambuje ku bijyanye na EP (Extended Play) azashyira hanze, ahishura ko kuri ubu ahugiye mu bikorwa bisanzwe by’umuhanzi ku giti cye birimo za collabo n’abandi bahanzi ndetse n’indirimbo nshya azashyira hanze mu ntangiriro za Nyakanga.

Uyu muhanzi umaze umwaka urenga yinjiye muri Label izwi nka 1:55Am, yashimiye abahanzi bayihuriyemo avuga ko abakunda kandi abafata nk’abavandimwe be, cyane ko bashyira imbaraga zabo zose mu kumushyigikira mu rugendo rwe rwa muzika.

Ross Kana yafashe rutemikirere yerekeza muri Ethiopia

Yateguje indirimbo nshya, ashimangira ko nta gitutu ajya ajyaho mu gusohora indirimbo

Kanda hano urebe 'Sesa' ya Ross Kana