Volleyball: Amakipe akina umukino wa nyuma yamenyekanye

Kuri uyu wa Gatandatu tariki ya 18 Gicurasi 2024, nibwo hakinwaga umunsi wa w’imikino ya kamarampaka (Play-Offs), imikino iri kubera mu nzu y’Imikino y’Ishuri rya Ecole Belge mu Mujyi wa Kigali. Uyu munsi wa Kabiri wasize Amakipe ya; Kepler VC, APR VC mu bagabo na Police WVC na APR WVC arizo zigomba gukina umukino wa nyuma.

Ikipe ya Kaminuza ya Kepler “Kepler VC”, yakatisha itike y’Umukino wa nyuma wa Shampiyona y’i 2024 nyuma yo gutsinda Ikipe ya Polisi y’Igihugu, amaseti 3-0 (32-30, 25-23,25-22).

Ni mu gihe kandi yari yayitsinze Umukino ubanza wakinwe tariki ya 17 Gicurasi 2024, amaseti 3-1.

Aya makipe yombi yasakiranye mu mikino ya Kamarampaka “Play-Offs”, ihuza amakipe 4 ya mbere yitwaye neza mu Mwaka usanzwe wa Shampiyona “Regular Season”.

Ku mukino wa nyuma, Kepler VC irahura n’Ikipe y’Ingabo z’Igihugu “APR VC”, yahageze isezereye Ikipe y’Ikigo cy’Igihugu gishinzwe Ingufu (REG), “REG VC”, iyitsinze Umukino wa Kabiri amaseti 3-1 (25-18,27-29,25-19,25-16) nk’uko yari no ku wa 5.

Mu cyiciro cy’abagore, Ikipe y’Ingabo z’Igihugu (APR WVC), yageze ku mukino wa nyuma isezereye iy’Akarere ka Ruhango (Ruhango WVC) ku ntsinzi y’imikino 2-0, ni mu gihe Ikipe ya Polisi y’Igihugu (Police WVC) nayo yahageze isezereye Ikipe y’Ikigo cy’Igihugu gishinzwe Imisoro n’Amahoro (RRA WVC), ku ntsinzi y’imikino ibiri ku busa.

Mu mukino w’Umunsi wa kabiri, APR WVC yatsinze Ruhango WVC amaseti 3-0 (8-25, 14-25, 19-25), mu gihe ari nako Police WVC yabigenje imbere ya RRA WVC (24-26, 17-25, 23-25).

Imikino yo guhatanira umwanya wa gatatu, irahuza RRA WVC na Ruhango WVC mu bagore, mu gihe mu bagabo, REG VC icakirana na Police VC.

Iyi mikino ya Kamarampaka “Play-Offs”, ikinwa amakipe atanguranwa gutsinda imikino 3. Iyo Ikipe itsinze indi imikino 2-0, biba birangiye. Mu gihe zinganyije umukino 1-1, Hitabazwa umukino wa 3.

Mu Mwaka usanzwe wa Shampiyona, wari wasojwe ikipe ya REG VC ari iya mbere, ikurikiwe na Police VC, Kepler VC na APR VC.