Ishyirahamwe ry'umupira w'amaguru mu Rwanda FERWAFA, ryandikiye ikipe ya AS Muhanga riyimenyesha ko ikirego yatanze irega Espoir FC ko kitujyuje ibisabwa.
Tariki 14 Gicurasi 2024, nibwo ikipe ya AS Muhanga yandikiye ishyirahamwe ry'umupira w'amaguru mu Rwanda FERWAFA iyiha ikirego kirega ikipe ya Espoir FC.
Muri iki kirego ikipe ya AS Muhanga ivuga ko ikipe ya Espoir FC ifite abakinnyi 34 bafite ibyangombwa aho kuba 30 nk'uko amategeko ya FERWAFA abiteganya. AS Muhanga kandi ivuga ko ikipe ya Espoir ikinisha umukinnyi witwa Christian Watanga Milembe ufite ibyangombwa byo mu bakinnyi bato kandi arengeje imyaka 20.
Nyuma yo kwakira iki kirego, ishyirahamwe ry'umupira w'amaguru mu Rwanda FERWAFA ryamenyesheje AS Muhanga ko hagendewe ku mategeko agenga amarushanwa y'uburyo ikirego gitangwamo, ikirego cya AS Muhanga kitujuje ibisabwa kugira ngo cyakirwe.
Iki kirego gitanzwe nyuma y'uko ikipe ya AS Muhanga ibuze itike y'imikino ya nyuma yo gukuranwamo ku makipe ashaka kuzamuka, dore ko yabaye iya gatatu irushwa amanota 5 n'ikipe ya Espoir FC kandi mu matsinda 2 y'icyiciro cya kabiri hazamuka amakipe 2 muri buri tsinda.
Eng
RSS 
TANGA IGITECYEREZO