Imibare ya Carlo Ancelotti muri UEFA Champions League imugira umuntu w'igitangaza

Carlo Ancelotti wagiye anyura mu makipe atandukanye nka Real Madrid, AC Milan, Juventus ndetse n'andi, yagiye akora akazi gakomeye byumwihariko mu mikino ya UEFA Champions League.

Nubwo Carlo Ancelotti amaze kwegukana UEFA Champions League inshuro enye, ni umutoza umaze kurenga nibura kimwe cya munani inshuro 14 mu makipe atandukanye yagiye atoza.

Bwa mbere Carlo Ancelotti arenga imikino ya kimwe cya munani muri UEFA Champions League, hari mu 1999, ubwo yatozaga Juventus mu bu Butaliyani, aho byarangiye Juventus igarukiye muri kimwe cya kabiri.

Mu mwaka wa 2003, Carlo Ancelotti bwari ubwa kabiri arenze muri kimwe cya munani, imikino yarangiye anafashije AC Milan kwegukana iki gikombe. Muri 2004 nabwo yafashije AC Milan kugera muri kimwe cya Kane, muri 2005 atsindirwa ku mukino wa nyuma  na Liverpool, mu 2006 arongera ageza AC Milan muri kimwe cya kabiri, naho 2007 yongera gufasha AC Milan kwegukana UEFA Champions League.

Carlo Ancelotti yongeye kugaragara mu 2010 na 2013, ubwo 2010 yagezaga Chelsea muri kimwe cya Kane, naho 2013 ageza Paris Saint-Germain muri kimwe cya Kane.

Muri 2014, Carlo Ancelotti yatwaye UEFA Champions League ku nshuro ya gatatu, ayitwarana na Real Madrid, nyuma yo gutsinda Atletco Madrid ku mukino wa nyuma.

Muri 2015 yagejeje Real Madrid muri kimwe cya kabiri, nuko yongera kugaragara mu 2017 ubwo yagezaga ikipe ya FC Bayern Munich muri kimwe cya Kane.

Muri 2022 nanone Carlo Ancelotti yagaragaye afasha Real Madrid kwegukana UEFA Champions League ya 14, iba iya Kane ku ruhande rwa Carlo Ancelotti, ubwo yatsinze Liverpool igitego kimwe ku busa. 

Muri 2023, Carlo Ancelotti yafashije Real Madrid kugera muri kimwe cya Kabiri, aho yasezerewe na Manchester City.

Kugeza ubu mu 2024 nabwo Carlo Ancelotti yafashije Real Madrid kugera ku mukino wa nyuma, ubwo izacakirana na Brussia Dortmund, umukino uzabera Wembley mu Bwongereza.

Carlo Ancelotti kuzacakirana na Brussia Dortmund ku mukino wa nyuma muri UEFA Champions League, ni umwe mu batoza bafite imibare myiza muri iri rushanwa