Florian Wirtz wa Bayer Leverkusen yatowe nk'umukinnyi mwiza muri shampiyona y'u Budage

Florian Wirtz muri uyu mwaka w'imikino amaze gukinira Bayer Leverkusen imikino 47, mu mikino 51 iyi kipe imaze gukina mu marushanwa yose itaratsindwa. Imyitwarire yagize muri iyo mikino, yatumye atoranywa nk'umukinnyi mwiza wa Season 2023-24. 

Florian Wirtz yafashije Bayer Leverkusen kwegukana ibikombe cya shampiyona ku nshuro ya mbere ku ruhande rwa Leverkusen, iba ikipe ya mbere yegukanye igikombe cya Shampiyona mu Budage idatsinzwe umukino n'umwe.

Bayer Leverkusen imaze imikino 51 itaratsindwa, niyo kipe ya mbere ku Isi, ibashije kumara iyo mikino yose idatsindwa mu marushanwa yose.

Muri iyo mikino 47, Florian Wirtz yatsindiye Bayer Leverkusen ibitego 18, ibi bikaba byanashingiweho atorwa nk'umukinnyi mwiza wa Season 2023-24 muri Bundesliga.

Usibye kuba nta mukino iyi kipe iratakaza, iracyategerejweho ibindi bitangaza byo kwegukana Europa League n'igikombe cy'igihugu. Bayer Leverkusen niramuka igeze kuri ibyo bikombe, mu mwaka umwe gusa izaba ikoze ibyari byaranze mu myaka 120 yose.

Ukuyemo Shampiyona Bayer Leverkusen yegukanye uyu mwaka, mu myaka 120 iyi kipe yari imaze yegukanyemo ibikombe bibiri gusa, ariko uyu mwaka w'imikino wonyine iraca amarenga ko izegukana ibikombe bitatu.

Florian Wirtz wa Bayer Leverkusen yegukanye igihembo cy'umukinnyi mwiza wa Season 2023-24 muri Bundesliga 

Florian Wirtz na Bayer Leverkusen bamaze gukina imikino 51 ntagutsindwa