Jude Bellingham ashobora kuzegukana ibikombe bitatu bikomeye

Umwongereza w'imyaka 20 Jude Bellingham, ni umwe mu bakinnyi bato bari gutitiza isi. Bellingham ashobora kuba icyamamare kurushaho, aramutse yegukanye ibikombe bitatu bikomeye, kandi birashoboka ko yabigeraho.

Muri ibyo bikombe harimo shampiyona ya Esipanye Laliga, UEFA Champions League muri Real Madrid, ndetse na Euro hamwe n'ikipe y'igihugu y'u Bwongereza.

Jude Bellingham yageze muri Real Madrid avuye muri Brussia Dortmund, aguzwe Miliyoni 103£. Kuva yagera muri Real Madrid, amaze kuyitsindira ibitego 21, kandi ni umukinnyi ukina mu kibuga hagati.

Igikundiro cya Jude Bellingham, cyazamutse cyane mu mujyi wa Madrid, ubwo yafashaga Real Madrid gutsinda FC Barcelona mu mikino ibiri amakipe yombi amaze gukina muri uyu mwaka w'imikino.

Jude mu mikino ibiri amaze gukina na FC Barcelona, amaze kuyitsinda ibitego bitatu, bisobanuye ko ari umwe mu bakinnyi bazajya bazonga Barcelona mu gihe yakinnye na Real Madrid.

Kugeza ubu, Real Madrid ya Jude Bellingham ifite amahirwe menshi yo kwegukana igikombe cya shampiyona, kuko ni iya mbere muri Esipanye, aho ifite amanota 84. Ikaba ikurikiwe na Girona na Barcelona zifite amanota 71.

Igikombe cya kabiri Real Madrid ya Jude Bellingham ifite amahirwe yo gutwara ni UEFA Champions League, aho iri muri kimwe cya kabiri, kuri uyu wa Kabiri ikaba inafitanye umukino wa kimwe cya kabiri na Bayern Munich yo mu Budage.

Jude Bellingham anahabwa amahirwe yo kwegukana Euro ubwo azaba ari kumwe n'ikipe y'igihugu y'u Bwongereza. Ubwongereza ni kimwe mu bihugu bihabwa amahirwe yo kwegukana Euro, ukurikije urwego rw'abakinnyi bufite.

Jude Bellingham umaze gutsinda ibitego 21 muri Real Madrid, afite amahirwe yo kwegukana ibikombe bitatu bikomeye muri uyu mwaka w'imikino