Gen-z Comedy basuye urwibutso rwa Jenoside rwa Kigali, biyemeza gukumira icyahungabanya ubumwe- AMAFOTO

Ni igikorwa bakoze ku gicamunsi cyo kuri uyu wa Kabiri tariki 16 Mata 2024, mu rwego rwo kurushaho kumenya amateka cyane cyane muri iki gihe u Rwanda n’Isi bibuka ku nshuro ya 30 Jenoside yakorewe Abatutsi yatwaye ubuzima bw’abarenga Miliyoni mu gihe cy’iminsi.

Basuye ibice bitandukanye bigize uru rwibutso, berekwa uko Jenoside yateguwe, ukuri kw’ayo, uko yashyizwe mu bikorwa n’ingaruka yateje, ndetse n’uko Ingabo zari iza RPA zabohoye Igihugu, zigasubiza u Rwanda n’Abanyarwanda ijambo.

Imibare igaragaza ko ¾ ari urubyiruko rutuye u Rwanda. Bituma, Guverinoma ishyira imbaraga mu kubashyira mu myanya kugirango batangire gufata inshingano.

Umuyobozi wa CMA itegura Gen-z Comedy, Fally Merci yabwiye InyaRwanda, ko bahisemo gusura Urwibutso rwa Jenoside rwa Kigali mu rwego rwo kwiga amateka, no kurushaho kumva neza umusanzu w’abo mu rugamba rwo guhangana n’abahakana bakanapfobya Jenoside yakorewe Abatutsi.

Yavuze ko gusura ibice bitandukanye by’uru rwibutso byabafashije byinshi. Ati “Byatumye twiga kurinda ibyagezweho ndetse no gukumira icyari cyo cyose cyahungabanya ubumwe bw’Abanyarwanda.”

Fally Merci yavuze ko imyaka 30 ishize Jenoside yakorewe Abatutsi ihagaritswe nk’urubyiruko bihaye ‘umukoro wo gukomeza kurinda ibyagezweho no kurwanya abahakana bakanapfobya Jenoside yakorewe Abatutsi mu 1994’.

Urwibutso rwa Jenoside rwa Kigali, ruruhukiyemo imibiri y’abazize Jenoside yakorewe Abatutsi irenga ibihumbi magana biri na mirongo itanu (250,000).

Aha hakaba ari ku gicumbi cy’ imiryango y’abarokotse Jenoside, abavandimwe n’inshuti bahurira bibuka ababo.

Nk’ahantu ho kwibukira no gutanga inyigisho ku mateka yaranze u Rwanda, urwibutso rwa Jenoside rwa Kigali rushyira imbaraga mu kwigisha abantu ububi bwa Jenoside n’ubundi bwicanyi ndengakamere mu rwego rwo kurinda ko yakongera kubaho ukundi.

Mu gihe cy’iminsi ijana yo Kwibuka, abasura uru rwibutso basabwa gusiga ubutumwa bwo kwibuka mu gitabo cyagenewe abashyitsi, mu rwego rwo gukomeza kwibuka abazize Jenoside no gutera imbaraga abayirokotse.

Urwibutso rwa Jenoside rwa Kigali rugizwe n’ibice bitatu bisurwa, igice kinini ni ikivuga ku mateka ya Jenoside yakorewe Abatutsi mu 1994. Hari igice cyagenewe kwibuka abana bazize Jenoside n’igice kigaragaza amateka ya Jenoside yakozwe mu bindi bihugu kw’Isi.

Hari ibindi bice nkaho abantu bashobora kwigira amateka bakoresheje ikoranabuhanga, ubusitani ndetse n’imva rusange zishyinguwemo imibiri y’abazize Jenoside. Ibi bice byose bitanga inyigisho ku basura urwibutso.

Abagize Gen-z Comedy basuye Urwubutso rwa Jenoside rwa Kigali ruherereye ku Gisozi basobanuriwa amateka n’amahano yagwiririye u Rwanda 

Basobanuriwe byimbitse amateka y’u Rwanda mu gihe cya Jenoside yakorewe Abatutsi

Bafashe umwanya wo kunamira abazize Jenoside yakorewe Abatutsi mu 1994 bashyira n’indabo ahashyinguye iyi mibiri mu rwego rwo kubaha icyubahiro


 

Abagize Gen-Z Comedy biyemeje guhangana n’icyasenya ubumwe bw’Abanyarwanda

AMAFOTO: Tripus Photography