Rwatubyaye yabonye ikarita y'umutuku! Uko Abakinnyi b'Abanyarwanda bakina hanze bitwaye mu Cyumweru gishize

Uyu munsi duhereye muri Kenya ku munsi w'ejo ku Cyumweru, ikipe ya AFC Leopards ikinamo rutahizamu Gitego Arthur yatsindaga iyitwa Shabana igitego 1-0 mu mikino y'irushanwa rya Shield Cup.

Uyu mukinnyi w'Umunyarwanda yabanje mu kibuga ndetse anarangiza umukino wose adasimbujwe. Biteganyijwe ko muri shampiyona, AFC Leopards izagaruka mu kibuga ku Cyumweru ikina na Sofapaka.

Ikipe ya Gormahia FC ikinamo Sibomana Patrick na Emery Bayisenge yo izajya mu kibuga ku wa Gatandatu ikina na Kakamega Homeboyz muri shampiyona.

Muri Tanzania ho nyuma yo kuva mu mikino y'amakipe y'ibihugu, ntabwo imikino ya shampiyona iragaruka ikaba izagaruka Namungo ikinamo Kagere Meddie ikina na Azam.

Muri Libya naho ntabwo imikino yari yasubukurwa gusa Al Ahly Tripoli ikinamo Manzi Thierry izasubira mu kibuga tariki 20 z'uku kwezi ikina na Al -Madina naho Al Ta'awon yo ikinamo Haruna Niyonzima izasubira mu kibuga ikina na Al Akhdar tariki 21 z'uku kwezi kwa 4.

Muri Morocco,naho ntabwo imikino yari yakomeza,AS Far Rabat ikinamo Imanishimwe Emmanuel Manguende ikaba izasubira mu kibuga ikina na Berkane ku munsi w'ejo ku wa Kabiri ikina na Berkane.

Ku wa Gatandatu muri Afurika y'Epfo ikipe ya TS Galaxy ikinamo Ntwari Fiacre yatsindaga AmaZulu ibitego 2-0 muri shampiyona. 

Muri uyu mukino,uyu mukinnyi w'Umunyarwanda niwe waruri mu izamu kuva utangiye kugeza urangiye. Biteganyijwe ko TS Galaxy iri kumwanya wa 9 n'amanota 28 izasubira mu kibuga ikina na Royal AM kuwa Gatatu w'iki Cyumweru.

Muri Ukraine,ku wa Gatandatu ikipe ya Kryvbas Kryvyi Rih ikinamo Bizimana Djihad yatsindaga Veres Rivine ibitego 2-0 muri shampiyona.

Kapiteni w'Amavubi yari yabanje mu kibuga ndetse yewe arangiza n'iminota yose y'umukino. Biteganyijwe ko iyi kipe iri ku mwanya wa 2 n'amanota 46 izasubira mu kibuga ikina na Vorsikia ku wa Mbere w'icyumweru gitaha.

Ku wa Gatanu ,mu gihugu cy'u Bubiligi ikipe ya Standard de Liege ikinamo Hakim Sahabo yatsindwaga na Genk ibitego 5-1 muri shampiyona. 

Ntabwo uyu mukinnyi w'Amavubi yabanje mu kibuga gusa yinjiyemo asimbuye ku munota wa 85. Biteganyijwe ko Standard de Liege izasubira mu kibuga ikina na Oud-Herverlee Leuven ku wa Gatandatu w'iki Cyumweru.

Muri Macedonia,ku wa Gatandatu ikipe ya FC Shkupi ikinamo Rwatubyaye Abdul yatsindaga FK Vardar ibitego 3-0. 

Uyu mukinnyi w'Umunyarwanda yabanje mu kibuga gusa ku munota wa 82 ahabwa ikarita ya kabiri y'umuhondo bibyara umutuku ahita ava mu kibuga.

FC Shkupi kuri ubu iri kumwanya wa 2 muri shampiyona n'amanota 51, izasubira mu kibuga ikina na Tikvesh mu mikino y'igikombe cy'igihugu igeze muri 1/2 ku munsi wejo kuwa Kabiri.

Muri shampiyona y'icyiciro cya kabiri muri Sweden,ku munsi w'ejo ku Cyumweru ikipe ya Sandkvens IF ikinamo Byiringiro League na Mukunzi Yannick nyuna y'uko ivuye mu kiciro cya Gatatu yatangiye itsindwa na Landskrona ibitego 4-0.

Muri aba bakinnyi b'Abanyarwanda nta n'umwe wabanje mu kibuga gusa Byiringiro League yinjijemo asimbuye ku munota wa 77 naho Mukunzi Yannick we nta nubwo yari kuntebe y'abasimbura.

Biteganyijwe ko Sandkvens IF izasubira mu kibuga ku wa Gatandatu w'iki cyumweru ikina na Orebro muri shampiyona.

Muri Leta zunze ubumwe z'Amerika mu ikipe ya One Knoxville SC ikinamo Nshuti Innocent ku wa Gatandatu yatsindaga iyitwa Tormenta FC.

Ntabwo uyu rutahizamu w'Amavubi yari yabanje mu kibuga ariko yinjiyemo asimbuye ku munota wa 60.

Ikipe ya FC Kryvbas Kryvyi ikinamo Bizimana Djihad yatsindaga ibitego 2-0

AFC Leopards ikinamo Gitego Arthur yatsindaga igitego 1-0