Ruben Amorim yasezeranyije Manchester United igikombe cya Europa League

Uyu mutoza w’imyaka 38 yanditse amateka atari meza, aba umutoza wa mbere wa Manchester United utsinzwe imikino itanu muri icumi ya mbere mu marushanwa yose, nyuma ya Walter Crickmer mu 1932. Nubwo gutangira kwe kutari kwiza, iminsi ishize yatangiye kwerekana impinduka, bikamufasha kwinjira neza mu buzima bwa Manchester.

Nyuma y’umukino wa shampiyona batsinzemo Fulham ku Cyumweru, Amorim yavuze ko yiyumva nk’aho yongeyeho imyaka 10 mu buzima bwe nyuma yo gusimbura Erik Ten Hag mu Gushyingo.

Mu kiganiro n’itangazamakuru, Amorim yavuze ko imikinire yabo itahindutse cyane, ahubwo kuba abakinnyi babonye umwanya wo gukina no kwiga uburyo bw’imikinire, biri gutuma bagira ubushishozi mu kibuga.

Ruben Amorim yagize Ati "Ndabona itandukaniro rinini mu buryo dukina, ariko uyu munsi twagize umwanya wo gutekereza bihagije. Ubu ushobora kubona ko hari ibimenyetso byo gusobanukirwa umukino neza kuko dufite umwanya uhagije wo gukina no kumvikana."

Amorim yasabye abakinnyi be gushyira imbere intego yo gutwara igikombe, agaragaza ko buri mukino bagomba kuwufata nk’intambara iganisha ku ntsinzi. 

Ati "Twakwitwara neza umukino ku wundi tukagera ku gikombe. Iyo uri muri Manchester United, ntabwo ushobora gukina udashaka ibikombe. Ugomba guharanira gutsinda."

Mu matsinda ya Europa League, Manchester United yabaye iya gatatu, bituma yirinda gukina imikino ibiri ya kamarampaka, ihita ibona itike ya 1/8.

Amorim yavuze ko iyo ari inkuru nziza kuko bizaha abakinnyi umwanya wo kwitegura neza. Ati "Ibi ni ingenzi cyane kuri twe kuko biduha umwanya wo kwitoza, tugakomeza gushyira hamwe abakinnyi, abatoza n’abakozi bose b’ikipe."

Iyo dufite icyumweru cyo gutegura umukino, biduha umwanya wo gukora ku bitekerezo by’imikinire yacu no gutegura neza uko tuzahangana na mukeba. Ibi binyemerera kumenya neza abakinnyi banjye, bakanyizera kurushaho."

Ruben Amorim yasoje avuga ko intego ari ugutwara igikombe, kandi ko buri mukino uzaba ari intambara.

Ati "Tugomba gukora ibishoboka byose ngo dutware igikombe. Iyo ugeze muri iki cyiciro, uba ushobora gutsinda ikipe iyo ari yo yose. Tuzakomeza guhatana kandi abafana ba Manchester United bagomba kumenya ko tuzabaha byose muri Europa League."

Ruben Amorim yijeje abakunzi ba Man United gutwara igikombe cya Europa League