Afurika y'Epfo: Umwana w'imyaka umunani yarokotse impanuka yahitanye abantu 45

Mu mpanuka yabaye kuwa Kane Tariki ya 28 Werurwe 2024, muri Afurika y'Epfo impanuka yahitanye abantu 45 bari mu modoka itwara abagenzi yarohamye muri metero 50 ivuye ku iteme ikagwa mu manga.

Umukobwa w'imyaka umunani, bivugwa  ko ariwe  warokotse wenyine,ajyanwa  mu bitaro yakomeretse cyane. Iyo bisi yakoreye impanuka mu Ntara ya Limpopo ubwo yerekezaga muri Botswana.

Iyo modoka yacomotse feri, nuko ihanuka ku iteme riri mu muhanda wo ku musozi wa Mmamatlakala, umuhanda uri hagati y'umujyi wa Mokopane na Marken, mu ntera ya kilometero zigera kuri 300 mu majyaruguru y'umujyi wa Johannesburg, nkuko bitangazwa n'igitangazamakuru SABC cya leta y'Afurika y'Epfo.

Ibikorwa by'ubutabazi byakomeje kugeza ku mugoroba wa joro wo ku wa Kane, amakuru avuga ko bamwe mu bapfuye byagoranye kubageraho kubera ibisigazwa by'ibyasenyutse byabatwikiriye. 

Minisitiri ushinzwe gutwara abantu n'ibintu, Sindisiwe Chikunga, wagiye ahabereye  impanuka yihanganishije "imiryango yagizweho ingaruka n'iyi mpanuka ya bisi yapfiriyemo abantu".

Yavuze ko Leta y'Afurika y'Epfo izafasha mu gusubiza imirambo mu gihugu abapfuye bakomokamo, ndetse ikore iperereza ryimbitse ku cyateje iyo mpanuka. Yongeyeho ati: "Ibitekerezo n'amasengesho byacu biri kumwe namwe muri ibi bihe bikomeye".

"Dukomeje gushishikariza gutwara imodoka neza igihe cyose harimo no kuba maso cyane, kuko abantu benshi barimo gukoresha imihanda muri iyi mpera y'icyumweru izabamo Pasika."

Ivomo: BBC news