Ubwiza bwa Miss Ruzindana Kelia bwasembuye ibiganiro mu banya-Kenya bagaragaza ko bumva Ikinyarwanda

Aya mashusho yongeye kugarukwaho n'abakoresha imbuga nkoranyambaga muri iki gihe, ariko yafashwe ubwo uyu mukobwa yari mu rugendo rwo kwiyamamariza ikamba rya Nyampinga w'u Rwanda 2022, aho byaje kurangira yegukanye ikamba rya Nyampinga w’Umuco [Miss Heritage 2022].

Ni mu kiganiro yagiranye na Isimbi TV, agerageza kumvikanisha igisobanuro cyo kuba umuntu yabwirwa ko ari mwiza, no kuba yabwirwa ko ari umwana mwiza.

Ati "Iyo umuntu akubwiye ngo uyu muntu ni mwiza nkeka ko wenda aba agendeye ku bigaragara ariko hari ikintu kijya kincanga hari igihe umuntu avuga ko uyu ni mwiza kubera ibikorwa akora noneho hari n'igihe umuntu avuga ko ngo uri umwana mwiza..."

Aka gace gato k'iki kiganiro kashyizwe ku rubuga rwa X rw'umunyarwenya Churchill kamaze kurebwa n'abantu barenga ibihumbi 53. Uyu munyarwenya wamamaye mu biganiro bitandukanye muri Kenya, ubwo yashyiraga hanze iyi 'Video' yabajije abanya-Kenya niba basigaye bumva Ikinyarwanda.

Uruhumbirajana w'ibitekerezo byisukiranyije, ku buryo bamwe mu bagabo bagiye bandika bagaragaza ko bemeranya n'ibyo Miss Ruzindana Kelia yavugaga.

Ariko hari n'abandi bagiye bandika ibitekerezo, bavuga ko binyuze ku mbuga nkoranyambaga bakunze kubona ubwiza bw'Abanyarwanda, ariko ko iyo baje muri Kigali batajya bababona.

Ukoresha izina rya Super Morio yavuze ko ashingiye kuri iki kiganiro cya Kelia Ruzindana igihe kigeze kugirango asure u Rwanda. Akomeza ati "Ariko ikibazo cyanjye buri gihe ni iki, aba bakobwa umuntu abasanga he iyo ageze muri Kigali?"

Ukoresha izina rya Bedan Ke ku rubuga rwa X, yabiteyemo urwenya avuga ko ashingiye ku byavuye mu nama yahuje abagabo bo muri Kenya ‘Ndemeza ko abagabo b'Abanya-Kenya bose bumva Ikinyarwanda." 

Umukobwa witwa Luciah Muli Wambua we yagaragaje ko azi neza ko abagabo bose bo muri Kenya bumva kandi bavuga neza Ikinyarwanda. Ni mu gihe Patrick Kairo we yarebye inshuro 16 iki kiganiro 'kandi ndemeranya n'ibyo yavuze byose ku ntambara ya Ukraine [Yateraga urwenya]." Ati "Ari kuvuga mu ruhe rurimi."

George Best Njugunner we yavuze ko 'iyi n'iyo mpamvu imyambaro ya Arsenal yanditseho Visit Rwanda'. West Wing we yabwiye umunyarwenya Churchill ukurikirwa n’abantu barenga Miliyoni 1 ku rubuga rwa X, ko ashaka itike y'indege kugirango azasure u Rwanda mu gihe cya vuba.

Umunyarwenya Churchill yatangije ibiganiro byatumye abanya-Kenya batangarira ubwiza bwa Kelia Ruzindana

Ruzindana Kelia ubwo yiyamamarizaga kuba Miss Rwanda 2022 yabajijwe ku gisobanuro cy’ubwiza

Bamwe mu bagabo bo muri Kenya bagaragaje ko bumva neza ibyo Ruzindana yavugaga

Hari abagabo bibajije uko bigenda iyo baje mu Rwanda, kuko abakobwa beza bumva bavugwa batajya bababona

Ruzindana Kelia yegukanye ikamba rya Nyampinga w'Umuco 'Miss Heritage' muri Miss Rwanda 2022