Umugore wa Justin Bieber yashyize umucyo ku mwuka mubi uvugwa mu rugo rwabo

Kuva mu 2023 urugo rw'umuhanzi Justin Bieber n'umugore we Hailey Bieber rwakunze kugarukwaho cyane mu binyamakuru no ku mbuga nkoranyambaga, bivugwa ko urugo rwabo ruri mu marembera. Ibi ariko byatangiye kuvugwa nyuma y'uko Justin yatangaje ko yicuza kuba yarihutiye gushinga urugo kandi ko yabikoze abihubukiye. 

Uyu muhanzi ukomoka muri Canada yabivuze mu ntangiriro za 2023 gusa byakurikiwe n'amakuru atari meza yagendaga avuga ku mubano we n'umugore we binavugwa ko bapfa ko yanze kubyara ndetse akaba yaranabujije Justin gusubira mu muziki.

Kuva mu 2023 urugo rwa Justin na Hailey Bieber rwavugwagamo umwuka mubi

Mu minsi ishije aya makuru yaje gufata indi ntera ubwo Hailey Bieber yasaba uburengazira urukiko rwa New York rwo guhindura izina 'Bieber' agasubirana 'Baldwin' yiswe n'ababyeyi dore ko mu 2018 akimara kubana n'uyu muhanzi aribwo yafashe izina rye.

Benshi mu bakoresha imbuga nkoranyambaga batangiye kuvuga ko ntakabuza ko Justin na Hailey bari mu nzira zo gutandukana kubona ko uyu munyamideli yasabye kwikuraho izina ry'uyu muhanzi.

Kuba Hailey yarasabye urukiko kuvanaho izina ry'umugabo we mu mazina ye byongereye umurego amakuru yo kuba batabanye neza

Mu cyumweru gishize kandi Stephen Baldwin umukinnyi wa filime akaba na Se wa Hailey Bieber yanditse kuri Instagram ye ati: ''Musengere urugo rw'umukobwa wanjye na Justin Bieber'. Ubu butumwa yahise abusiba mu minota umunani gusa yarabumajijeho gusa ntibyabujije abantu kwibaza igitumye asabira urugo rwabo amasengesho.

Se wa Hailey uherutse gusabira amasengesho urugo rwabo nawe yatumye benshi bemeza ko aba bombi baba bari mu nzira zo gutandukana

Benshi batangiye kwibaza niba Hailey yaba arwaye cyangwa se asabye amasengesho kuko urugo rwabo rurimo umwuka mubi nk'uko bimaze iminsi bivugwa. Ubu butumwa ariko bwasesenguwe cyane kuri Tik Tok aho benshi bakoze amashusho avuga uburyo Justin na Hailey bari mu nzira ya gatanya.

Ubu uyu munyamideli yagize icyo avuga ndetse ahakana aya makuru amaze iminsi avugwa ku rugo rwabo, yemeza ko ibivugwa atari ukuri. Mu butumwa burebure Hailey yashyize kuri Instagram yagize ati: ''Inkuru zikomeje kunyura kuri Tik Tok inshuro 100% ntabwo ari byo baba bibeshye. Bazikura aho babonye kandi zituruka mu butaja bw'ibinyoma''.

Hailey yateye utwatsi ibimaze iminsi bivugwa ku rugo rwe, yemeza ko ari ibuhuha

Hailey Bieber yakomeje agira ati: ''Ndabizi babikora kugirango babibwire abafana bizera izo nkuru ariko mu menye ko ari ibinyoma''. Si inshuro ya mbere uyu mugore wa Justin Bieber ahakana amakuru y'umwuka mubi uvugwa mu rugo rwabo, mu gihe uyu muhanzi nta na rimwe arigera abihakana.