Ahabanza Iyobokamana

BurkinaFaso: Abakiristu 15 biciwe mu Kiliziya barimo gutura igitambo cya misa

Yanditswe na: Ngabonziza Justin
Taliki:26/02/2024 9:53 0

Abakiristu barimo gutura igitambo muri Diyosezi Gatolika ya Dori bagabweho igitero cyahitanye abantu 15.

Icyo gitero cyagabwe ku bakristu Gatolika barimo gutura igitambo cya misa mu gitondo cyo ku Cyumweru Tariki ya 25 Gashyantare 2024. Icyo gitero cyabereye muri Kiliziya iherereye mu Majyaruguru ya BurkinaFaso mu gace kitwa Essakane cyahitanye abakiristu 15 abandi babiri barakomereka.

Iki gitero bivugwa ko cyagabwe n'intagondwa zigendera ku mahame y'idini ya Isilamu zikomeje guhungabanya umutekano mu gihugu cya BurkinaFaso.

Mu itangazo ryasohowe na Diyosezi Gatolika ya Dori ryazwizweho umukono na Musenyeri Jean-Pierre Sawadogo Igisonga cy'Umwepisikopi (Vicaire General) iyi Diyosezi yatangaje ko yamaganye abakoze iki gitero cyahise gitana abakiristu 12 abandi batatu bapfa bagejejwe ku bitaro.

Mu butumwa bukubiye mu Itangazo ryasowe na Diyosezi Gatolika ya Dori, yamaganye abakoze ayo mahano ndetse isaba ababifite mu nshingano kwimakaza umucyo w’amahoro n’umutekano muri iki gihugu.

Iki gitero cyabaye nyuma y' ibindi bimaze iminsi bigabwa n’imitwe y’intagondwa zivuga ko zigendera ku mahame y'idini ya Isilamu. Ibyo bitaro bimaze igihe byibasira insengero, intagondwa zigashimuta abayobozi b’amadini n'amatorero ya gikirisitu.

Ivomo: 24Heuresinfo.com