Imbamutima za Anita Pendo ugira isabukuru ku munsi w'Abakundana

Anita Pendo agira isabukuru ku munsi wahariwe abakundana uzwi nka St Valentin uba buri mwaka ku ya 14 Gashyantare.

Mu butumwa yanyijije ku rukuta rwa Intagram ye, Anita ukunze kurangwa n’urwenya yashimye Imana ku burinzi bukomeye, ikamuba hafi mu buzima bwe bwa buri munsi akaba agihumeka umwuka w’abazima.

Pendo yanditse agira ati “Imana ishimwe yankoreye uburinzi bukomeye. Isabukuru nziza y’amavuko kuri njye”.

Uyu munyamakuru umaze imyaka itari mike muri aka kazi, yateye urwenya abwira abakunzi be ko na 'Mobile money' ye ifunguye ku bashaka bamuremera ku isabukuru ye iba buri tariki 14 Gashyantare. Ati “Momo yanjye irakora muntemo".

Anita Pendo uherutse gutangaza ibyamuteye guhinduka icyamamare birimo gukora cyane, yanatangaje ko ubuntu bw’Imana bwatumye akomera mu byo yerekejeho umutima byose, bishyigikirwa no kurangwa n’ikinyabupfura mu kazi ke.

Ati “Ubuntu bw’Imana bwatumye nkomera mu mwuga biherekezwa no kwitwararika mu kazi kanjye ka buri munsi, ariko bihuye no kugira ikinyabupfura binganisha ku ntambwe ikomeye”.

Uyu mubyeyi w’abana babiri ni umwe mu barambye mu mwuga w’itangazamakuru kandi akora ku mitima ya benshi bitewe n’umurava umuranga mu byo akora byose.