Mama Sava yakabije inzozi yinjira mu bakinnyi b’ikinamico mu Indamutsa

Ni umwe mu bakinnyi ngenderwaho muri filime yamamaye nka ‘Papa Sava’ itambuka ku muyoboro wa Youtube, ndetse akina yitwa Mama Sava- Izina ryamukujije mu rugendo rwa cinema yiyeguriye nyuma yo gusoza amasomo ajyanye n’ubucangamutungo mu mashuri yisumbuye.

Akina ari umugore wa Niyitegaka Gratin ‘Papa Sava’, umukinnyi wa filime ufatwa nk’ishyiga ry’inyuma muri cinema bitewe n’ibikorwa amaze gutangiza, byatumye impano za benshi mu bakinnyi zigaragaza ku isoko muri iki gihe.

Ku wa 3 Gashyantare 2024, Mama Sava nibwo yashyize umukono ku masezerano n’Ikigo cy’Igihugu cy’Itangazamakuru (RBA), nk’umukinnyi w’ikinamuco mu Indamutsa.

Aya masezerano ajyanye n’imikoranire hagati ye ndetse na RBA, agamije kongera imbaraga no gushyigikira abakinnyi ndetse no kubateza imbere.

Kuri Mama Sava, ni intambwe ateye ikomeye mu buzima bwe, nyuma yo kugaragara muri filime zitandukanye. Yabwiye InyaRwanda ati “Ni ikintu cyanshimishije cyane, ndetse cyinyongera imbaraga, bituma nongera kumva ko kizangeza kure heza hashoboka.”

Asobanura ko ari undi muryango mushya yungutse, kandi guhura n’abakinnyi b’ikinamico ni kimwe mu byamufashije. Ati “Nahuye n’abakinnyi b’ikinamico. Nari mfite amatsiko yo kubona ndetse nishimira ko mbonye undi muryango mushya kandi mwiza.”

Uyu mukinnyi wa filime avuga ko nyuma yo gusinya amasezerano, yatangiye imyiteguro imuganisha ku kwitegura gukina muri zimwe mu ikinamico zizatambuka kuri Radio Rwanda.

Yasobanuye ko azabasha guhuza gukina filime ndetse n’ikinamico, kuko ari ibintu byuzuzanya mu buhanzi. Ati “Nzabihuza kandi bigende neza, buri kazi ukemera kuko ubona nyine wagafatanya n’akandi ntihagire icyo bibangamira.”

Mama Sava aherutse kubwira Ishusho TV, ko yinjiye mu gukina filime nyuma yo kubona ko akazi yakoraga k’ubucungamutungo kashoboraga guhagarara mu gihe atari yiteguye.

Ati “Mbere y’uko nkina filime nari umucungamutungo [...] kuko nibyo nize, narabyukaga bisanzwe nk’umuntu wese ufite akazi, nagiye muri filime maze iminsi ntari gukora akazi karahagaze.”

Yavuze ko kwinjira muri filime “Seburikoko” yaguye izina rye, byaturutse ku butumwa yabonye ku rukuta rwa Facebook yiyemeza kugerageza amahirwe.

Akomeza ati” Njye nabonye ubutumwa kuri Facebook buvuga ko abantu bashaka kugaragara muri filime yitwa “Seburikoko” bakwitabira igikorwa cyo gufata amashusho bampa gukina ndi umuntu usanzwe mbikora neza barabishima, kugeza ubwo bampaye urugo muri iyo filime.”

Uyu mugore w’imyaka 27 y’amavuko yavuze ko izina ‘Mama Sava’ arifata nk’urufatiro rw’ubuzima bwe. Yungamo ati “Izina Mama Sava ndifata nk’ishyiga ry’inyuma nyine rya rindi ribura ntibateke, niryo ryankomeje ryatumye impano yanjye yaguka, kugera aho ngeze aha.”

Mama Sava yinjiye mu bakinnyi bashya b’ikinamico mu Itorero Indamutsa, asangamo umukinnyi wa filime ugezweho muri iki gihe Nsabimana Eric wamenye nka Dr Nsabi.

Dr Nsabi aherutse kuvuga ko gukina mu ikinamico ari nk’umugisha yagize kuri we. Ati “Kuva Kera nakundaga kumva ikinamico kuri Radio Rwanda mu gukura kwanjye urwo rukundo nararukuranye no mu gihe najyaga kwinjira muri sinema ni bimwe mubyo nareberagaho rero byari inzozi kuva kera.”

 

Mama Sava yatangaje ko yinjiye mu bakinnyi b’ikinamico mu Itorero Indamutsa

Mama Sava yavuze ko yakuze akunda ikinamico ku buryo yumvaga igihe kizagera akaba umwe mu bakinnyi

Mama Sava avuga ko yatangiye imyiteguro yo gukina muri zimwe mu ikinamico ziri gutegurwa

Mama Sava asobanura ko azabafasha guhuza gukina muri filime ndetse no mu ikinamico

KANDA HANO UREBE AGACE GASHYA KA FILIME ‘PAPA SAVA, MAMA SAVA AGARAGARAMO