Muyango yahuje Nirere Shanel n’umuhungu we mu gitaramo cyo kumurika Album ye "Imbanzamumyambi"

Muyango amaze iminsi ari kwitegura gukora iki gitaramo cye kizabera muri Kigali Conference and Exhibition Village ahazwi nka Camp Kigali.

Nirere yavuze ko yatewe ishema no kuba agiye gukabya inzozi zo gutaramana na Muyango mu gitaramo. Ati “Twongeye twataramye! Ndarota! Nishimiye ko ngiye gukabya inzozi zo gutaramana n' Imbanzamumyambi intore nkunda cyane Muyango.”

Inki uzaririmba muri iki gitaramo, ni umuhungu wa Muyango wamenyekanye cyane mu ndirimbo zirimo nka ‘Miriyoni’ yakoranye na Ruti Joel, ‘Wanjye’, ‘Simbizi’ n’izindi.

Muyango aherutse kuvuga ko kuba agiye guhurira ku rubyiniro n’umuhungu we ari umunezero udasanzwe. 

Ati “Ukwibyara gutera ababyeyi ineza. Imvugo ibaye ingiro, imfura yanjye Inkindi ni we uzafungura ingamba, ambanzirize mu gitaramo Imbanzamumyambi tariki ya 24 Ukuboza 2023. Umutima wanjye uranezerewe. Ishyuke mwana wanjye. Ramba kandi uririmbe cyane.”

Muyango ni umwe mu bahanzi b’abahanga cyane bubakiye umuziki wabo kuri gakondo. Afite ibihangano binyura benshi byamamaye kumurusha kuko kenshi iyo muganira akubwira ko hari igihe ajya mu birori bakaririmba indirimbo ze batarabutswe ko ahari.

Mu mabyiruka ye akubwira byinshi. Ariko yitsa cyane ku kuba atarabashije kuba mu Rwanda igihe kinini cy’ubuto bwe.

Muyango yahungiye mu Burundi mu 1961; yahageze akiri umwana, aranahakurira. Aha ni ho inganzo ye yatangiye kuyigaragariza mu matorero atandukanye.

Muyango aherutse kubwira InyaRwanda ko iyi album ye ya kane agiye gukorera igitaramo cyo kuyimurika, yayitiriye icyivugo cye.

Hari aho yavuze ati “Impamvu album yanjye ya kane nayise ‘Imbanza mu myambi’ icyo ni icyivugo cyanjye. Nabyiswe n’umutoza wanjye wa kera, icyo gihe narahamirizaga cyane banyise gutyo kuko ninjye wari ku mukondo w’izo ntore, kera narahamirizaga nubwo ubu ndirimba.’’

Avuga ko impamvu yahisemo gukoresha iki kivuga kuri iyi album ye ari uko ariyo album ya mbere akoze ari wenyine.

Mu 1986-1987 ni bwo Muyango yategewe indege n’Itorero ry’Abakobwa babaga mu Bubiligi ‘Imitari’, yerekeza ku Mugabane w’u Burayi kubafasha gukora indirimbo zabo.

Itorero Imitari ryatangiye gushaka gukora indirimbo zabo, nyuma y’igihe ribyina iz’abahanzi b’Abanyarwanda babaga mu buhungiro. Akigera mu Bubiligi ni bwo bihuje, birangira yinjiye mu Itorero Muyango n’Imitari.

Ku ikubitiro bakoranye indirimbo zinyuranye zasohotse kuri casette ya mbere bakoze mu 1989-1990. Zirimo “Manyinya”, “Mwiriwe neza”, “Mpore” n’izindi. Ibihangano byabo ntibyacurangwaga mu Rwanda kuko bafatwaga nk’abarwanya Leta yariho.

Ku batazi ‘Imitari’, ni itorero ry’abakobwa b’abanyarwanda bishyize hamwe bagera kuri 12, ryatangiriye mu Bubiligi mu mwaka wa 1979. Bamwe bari batuye mu Bubiligi abandi bagenda bahabasanga baje kuhiga.

Muyango we ni Intore yatojwe na se umubyara Rwigenza na sekuru Butera bazwi cyane mu ngamba Inyanza mu Rukari.

Mu 1989 babonye igihembo cyitwa “Lauréat du Prix Découvertes de la Radio France Internationale” kubera indirimbo “Nzavuga yaje".

Mu nshuti z’u Rwanda Muyango yatoje itorero yise ‘Ibirezi’ ryari rigizwe n’abakobwa b’Ababiligi ndetse mu mwaka wa 2002 yabazanye gukorera ibitaramo bitandukanye mu Rwanda muri FESPAD (Festival Panafricain de la Danse).     

Nirere Shanel yatangaje ko bishimishije kuba agiye guhurira ku rubyiniro na Muyango

Inki, umuhungu wa Muyango ategerejwe mu gitaramo kizaba tariki 24 Ukuboza 2023

Muyango avuga ko iyi album idasanzwe mu buzima bwe, kuko yayitiriye ikivugo cye

Muyango agiye kuririmba muri iki gitaramo mu gihe aherutse gutanga ibyishimo mu gitaramo ‘MTN Iwacu Muzika Festival’

KANDA HANO UREBE AMASHUSHO Y’INDIRIMBO ‘MILIYONI’ YA INKI NA RUTI JOEL

">