Burundi: Gen. Bunyoni ushinjwa ibyaha birimo gushaka kwica Perezida yakatiwe gufungwa burundu

Kuri uyu wa Gatanu tariki ya 8 Ukuboza 2023, Urukiko rw'Ikirenga mu gihugu cy'u Burundi rwatangaje ko  General Alain Guillaume Bunyoni  wahoze ari Minisitiri w'Intebe yakatiwe igihano cyo gufungwa burundu.

General Alain Guillaume Bunyoni yahamijwe ibyaha birimo kugerageza kwica umukuru w'Igihugu cy'u Burundi, no guhungabanya ubukungu bw'Igihugu.

Mu rubanza rwatangiye kuburanishwa mu ntangiriro z'ukwezi gushize, ibyaha icyenda aregwa muri urwo rubanza hibanzwe ku byaha bitatu birimo gushaka guhirika ubutegetsi no kwica umukuru w'Igihugu.

Gen Bunyoni waburaniye kuri gereza nkuru ya Gitega afungiyemo, ubwo yaregwaga ku cyaha cyo guhirika ubutegetsi yashinjaga gushaka gukorana n’abahunze igihugu, barimo  umunyamakuru wa Radiyo RPA yavuzweho gukorana n'abatavuga rumwe n'ubutegetsi bw'Ishyaka rya CNDD / FDD.

Abaregwaga mu rubanza rumwe na General Alain Guillaume Bunyoni babiri bakatiwe igihano cyo gufungwa imyaka 15, batatu bakatirwa gufungwa imyaka itatu mu gihe umwe muribo yagizwe umwere.