NBA Regular Season: Miami Heats na Cleveland Cavaliers zagize umunsi mwiza, Nuggets ikorwa mu jisho

NBA Regular Season yari imaze iminsi ibiri yarahagaze kubera ko hakinwaga irurushanwa riyikonotseho rya  NBA in season Tournament. Ni irushanwa ryasize Milwaukee Bucks, Indiana Pacers,  Los Angeles Lakers na New Orleans Pelicans zigeze muri kimwe cya Kabiri.

Denver Nuggets yongeye gukorwa mu jisho na Los Angeles Clippers. 

Ni umukino Denver Nuggets yari yasuye LA Clippers ku kibuga cya Crypto.com Arena, gisanzwe gikinirwaho n'amakipe abiri ariyo LA Lakers na LA Clippers. Umukino warangiye ari amanota 111 ya LA Clippers ku 102 na Nuggets.

Ni umukino Nuggets yatsinze agace ka mbere n'aka gatatu, mu gihe LA Clippers yatsinze aka kabiri n'aka Kane.

Agace ka mbere Denver Nuggets yatsinze 36 kuri 21, aka gatatu itsinda 25 kuri 18. LA Clippers agace ka kabiri yatsinze 40 kuri 21 naho aka nyuma itsinda 32 kuri 20.

Denver Nuggets Yatsinzwe na Los Angeles Clippers, ikomeza kujya ahabi

Mu mikino ikomeye yabaye muri NBA, Cleveland Cavaliers yatsinze Orlando Magic ku kibuga cyayo cya Rocket Mortgage FieldHouse. Ni umukino warangiye ari amanota 121 ya Cavaliers ku 111 ya Orlando Magic.

Mitchell na Garland ba Cleveland Cavaliers bakinnye neza agace ka mbere, bakoramo ikinyuranyo cyatumye bacyura intsinzi dore ko ari ko konyine batsinze n'amanota 37 kuri 20 ya Orlando Magic.

Magic yatsinze agace ka kabiri n'aka Kane, mu gihe aka Gatatu Amakipe yombi yanganyije Amanota 34 ku yandi.

Agace ka kabiri Orlando Magic yatsinze amanota 32 kuri 28, naho aka Kane itsinda 25 kuri 22.

Cleveland Cavaliers yatsinze Orlando Magic 

Miami Heat yatsindiye Toronto Raptors kuri Scotiabank Arena. Ni umukino warangiye ari amanota 103 ya Toronto Raptors ku 112 ya Miami Heat.

Toronto Raptors yari imbere y'abana bayo, yatsinze agace ka kabiri, mu gihe utundi twose twihariwe na Miami Heat.

Agace ka mbere Miami Heat yatsinze 37 kuri 32, aka Gatatu itsinda 32 kuri 18 naho aka Kane itsinda 25 kuri 19. Toronto Raptors yatsinze agace ka Kabiri n'amanota 34 kuri 27.

Miami Heat yatsinze Toronto Raptors, ikomeza gutanga ikizere 

Ejo ku wa Gatanu nta mikino ya NBA Regular Season iteganyijwe, ahubwo hateganyijwe Imikino ya ½ ya NBA In season Tournament  izahuza Milwaukee Bucks na Indiana Pacers, mu gihe Los Angeles Lakers izahura na New Orleans Pelicans.

Muri iyi mikino ya NBA In season Tournament,ikipe zizatsinda zizahurira ku mukino wa nyuma uteganyijwe ku Cyumweru, tariki 10 Ukuboza 2023 i Las Vegas.