Mu mwaka w'imikino ushize, umunya Denmark Pierre-Emile Hojbjerg ni umwe mu bakinnyi Tottenham yagenderagaho mu Kibuga hagati. Gusa kuri ubu siko bikimeze.
Kuva Tottenham Hotspurs yatangira gutozwa na Ange Posteccoglou, Pierre-Emile Hojbjerg imikino yose muri uyu mwaka w'imikino ayirebera ku ntebe y'abasimbura.
Nubwo Pierre-Emile Hojbjerg atakibona umwanya wo gukina mu kibuga hagati muri Tottenham Hotspurs, Tottenham niyo iyoboye urutonde rwa shampiyona ya English Premier League kugeza ubu.
Pierre-Emile Hojbjerg w'imyaka 28 y'amavuko, aheruka kubanza mu kibuga, ubwo Tottenham Hotspur yatozwaga na Antonio Konte ukomoka mu Butaliyani.
ESPN yavuze ko ubwo uyu munya Denmark Pierre-Emile Hojbjerg, yabazwaga impamvu atagikinishwa, ngo yasubije igisubizo kitanyuze iki kinyamakuru.
Pierre-Emile Hojbjerg yagize ati " Dusigaye twarahinduye imikinire mishya, kandi ikunze kungora. Ikindi ntabwo twakwirengagiza ko umutoza nawe yahindutse.
" Kuri ubu nka Tottenham Hotspurs duhagaze neza kuko turi aba mbere. Ibyo kuba ntakina narabyakiriye, kandi ngomba kubifata uko biri. Ntacyo nabikoraho.
Pierre-Emile Hojbjerg utakibona umwanya wo gukina muri Tottenham Hotspurs, afite amasezerano azamugeza muri 2025. Mu mpeshyi, Tottenham Hotspurs yanze kumutiza ubwo Manchester United yari imushaka.
Pierre-Emile Hojbjerg nawe ari mu bakinnyi batarahesha Tottenham Hotspurs igikombe. Mu mpeshyi Harry Kane we yakuyemo ake karenge ayisohokamo kubera Spurs itaba ikozwa ibyo gutwara igikombe. Gusa ubanza atariko bimeze muri uyu mwaka w'imikino dore ko iyoboye urutonde rwa shampiyona ya English Premier League.
Pierre-Emile Hojbjerg ntabwo akibona umwanya wo kubanza mu kibuga muri Tottenham Hotspurs
Pierre-Emile Hojbjerg aheruka kubanza mu kibuga Tottenham Hotspurs itozwa na Antonio Konte
Eng
RSS 
TANGA IGITECYEREZO