Guverinoma yigomwe 135 Frw kuri buri Litiro ya Mazutu n’aziyongera ku rugendo rwa Bus

Kuri uyu wa Kabiri tariki 3 Ukwakira 2023, nibwo Urwego rw’Igihugu Rushinzwe Imirimo imwe n’imwe ifite igihugu akamaro (RURA) rwatangaje ko Igiciro cya lisansi cyageze ku 1822Frw/L, kivuye kuri 1639 Frw/L. Ni mu gihe igiciro cya mazutu cyageze ku 1662 Frw/L kivuye kuri 1492 Frw/L.

Minisitiri Gasore asobanura ko uko ibiciro bya Lisansi bizamuka ku rwego mpuzamahanga, ari nako bizamuka mu giciro cyo kubizana mu Rwanda.

Mu kiganiro na Televiziyo Rwanda, Gasore yavuze ko ibi biterwa n’uko u Burusiya na Arabia Saudite byatangiye kugabanya ingano ya Peteroli bishyira ku isoko.

Yavuze ko Guverinoma izakomeza gutangira nkunganire mu rwego rwo gufasha abaturage kugirango bataremererwa n’ibiciro by’ibikomoka kuri Peteroli, ari nayo mpamvu Leta yigomwe 135Frw kuri buri Litero ya Mazutu.

Bisobanuye ko iyi nkunganire itarimo igiciro cyazamuka cyane. Minisitiri Gasore anavuga ko Leta izakomeza kunganira abaturage no ku giciro cy’urugendo kugirango kitazazamuka cyane.

Ati "Leta yakomeje kugerageza gushyiraho nkunganire ku buryo mu mezi yose ashize mu Rwanda ni twe dufite ibiciro biri hasi kugereranya n'ibihugu duturanye."

Akomeza ati "N'ubu rero irimo. Byumwihariko kuri Mazutu, kuri buri Litiro umunyarwanda aguze Leta izajya imwishyurira amafaranga 135 kuri Litiro. Ndetse, hariho n'iyindi nkunganire kuri 'Public transport' (kugenda muri Bus) tuzakoresha uko dushoboye ku buryo icyiyongereyeho ku giciro cya Bus ari Leta ikimenya abanyarwanda ntibongere amafaranga bishyuraga kuri Bus."

Minisitiri Gasore avuga ko guverinoma izanakomeza gutanga nkunganire mu bijyanye no gutwara abantu mu buryo bwa rusange, kugira ngo igiciro cy'urugendo kitazamuka.

Yavuze ko ikibazo cy’ingendo rusange ari kimwe mu bibazo gihangayikishije abantu, kandi ko hari gushakwa umuti urambye, aho isoko rishobora guhabwa abantu bikorera, cyangwa hakarebwa ubundi buryo bwo gukemura ikibazo ‘kuko nta stock ya bus dufite mu gihugu uyu munsi’.

Minisitiri Gasore yavuze ko babaye bafashe ingamba zitari z’igihe kinini mu gukemura ikibazo cyo gutwara abantu mu buryo bwa rusange muri Kigali zirimo:

Kwifashisha bisi zikodeshwa zikunganira izisanzwe zitwara abagenzi, gukorana n'abasanzwe batwara abagenzi, kugira ngo babone ubushobozi bwo gukoresha bisi ziri mu magaraje, Kwifashisha bisi ziri mu byerekezo bidafite abagenzi zigakoreshwa ahari abagenzi benshi mu masaha amwe n'amwe.

Hari kandi gushyiraho Parking yihariye y'imodoka z'imyanya 7 (inyinshi zisanzwe zitwara abagenzi mu buryo butemewe) abafite imodoka z'imyanya 7 bazazijyana zandikwe, zihabwe ibiziranga n’uburenganzira bwo gutwara abagenzi mu buryo bw'agateganyo. Nta kiguzi mu kwiyandikisha kandi nta n’umusoro kuko ‘ni uburyo bw’agateganyo’.

Bwana Gasore anavuga ko hari Bus zatumijwe hanze zizifashishwa mu gukemura iki kibazo. Avuga ko izi ngamba zafashwe ari iz’igihe gito, ku buryo nta muntu ukwiye kujya kugura ‘Taxi Voiture’ ngo kuko yumvise hashyizweho uburyo bwo gutwara aba bantu, kuko ari iby’igihe gito.

Dr. Gasore Jimmy avuga ko ku rwego rw’Igihugu muri rusange nta kibazo cya Peteroli gihari, kandi ko nk’Igihugu hashyirwa imbaraga nyinshi mu bishoboka byose kugirango iki kibazo kitazagira kibaho ukundi.

Minisitiri w'Ubucuruzi n'Inganda, Dr Jean Chrysostome Ngabitsinze, avuga ko Peteroli mu guhinduka kwayo kenshi ihindukana n’ibiri mu buhinzi n’ubworozi, kuko ari nayo ikoreshwa cyane mu bucuruzi bw’ibiribwa. Yavuze ko 11% ku giciro cya mazutu cyiyongereyeho adakwiye gutumara hari umucuruzi uzamura ibiciro.

Avuga ko ihinduka ry’ibiciro by’ibikomoka kuri Peteroli bitakagize ingaruka ku buhinzi n’ubworozi. Ati "[...] Akantu kazamukaho ni akantu nakwita gato cyane ku buryo katakagombye gutera ikibazo muri 'transport' cyangwa se mu gutunganya ibikomoka ku buhinzi n'ubworozi, ari nayo mpamvu buri gihe tuvuga y'uko Peteroli mu guhinduka kwayo ihindukana cyane n'ibikomoka ku buhinzi n'ubworozi n'uko gusa ubu nyine turi mu bihe nyine by'izuba ariko mu busanzwe nta cyagombaga guhinduka…”

Ngabitsinze avuga ko umusaruro w’igihembwe cya B wagabanutseho, kandi nticyagenda neza nk’uko abahinzi babyifuzaga, bituma umusaruro ugabanukaho 3%.

Yavuze ko hari icyizere cy’uko ‘Season A’ y’igihembwe biteze ko izagenda neza. Avuga ko iyo umusaruro wagabanutse, abacuruzi b’ibiribwa bafite uburenganzira bwo kubikura ahandi, kugirango hatagira ubura ibiribwa ku maso.

Guverinoma yafashe ingamba z’Agateganyo zo gushaka ibisubizo byihuse mu gutwara abantu mu buryo rusange

Ibiciro bishya by'ibikomoka kuri peteroli, bizatangira kubahirizwa tariki ya 4 Ukwakira 2023