Abafite imishinga igamije kurengera ibidukikije bashyizwe igorora

Iki kigega kivuga ko iyi nkunga izahabwa abagize Imiryango itari iya Leta (CSOs) n’inzego z'ibanze zikubiyemo Uturere twose n’Umujyi wa Kigali, mu rwego rwo gushyira mu bikorwa imishinga ifasha abaturage guhangana n’ingaruka z’imihindagurikire y’ibihe.

Iyi nkunga, izatangwa na Minisiteri y’Ibidukikije, ibicishije mu Kigega cy’Igihugu cy'Ibidukikije binyuze mu mushinga witwa “Subnational Adaptation Fund Enhanced Direct Access.’’

Imishinga izaterwa inkunga igomba kuba ishingiye ku ngingo zirimo ubuhinzi burengera ibidukikije, gukoresha neza ubutaka mu buryo burambye, kubungabunga no gukoresha neza amazi no kuhira ku buso buto kandi bigakorwa mu buryo bugezweho.

Inyandiko isobanura umushinga uzaterwa inkunga igomba kuba igaragaza ko umushinga uzamara igihe kirekire, aho inyungu izaturuka nyuma yo guhabwa inkunga, kandi uwo mushinga ukaba ufitiye umumaro abaturage, utagira uwo uheza kandi ukaba ukurikiza uburyo bw'isuzumangaruka ku bidukikije n'imibereho “Environmental and Social Management Framework” bw’Ikigega cy’Igihugu cy'Ibidukikije.

Ku bujuje ibisabwa, gusaba inkunga yo gushyira mu bikorwa imishinga igamije guhangana n’imihindagurikire y’ibihe ubu birafunguye ku Miryango itari iya Leta (CSOs) n’inzego z'ibanze (Uturere n’Umujyi wa Kigali) bikaba bizahagarara tariki 20 Ukwakira 2023 saa kumi n’imwe z’umugoroba ku rubuga: www.greenfund.rw