Ikibazo cy’ikoreshwa nabi rya telefone n’indi myitwarire idahwitse mu rubyiruko kiri ku bana cyangwa ku babyeyi?

Impunguke mu by’imibanire ya Muntu zemeza ko ikibazo cy’urubyiruko rw’iki gihe ruhugiye muri telefone gusa rudashobora gufasha ababyeyi imirimo yo mu rugo ndetse ugasanga rurishora mu mico mibi akenshi runakomora kuri izo telefone rwirirwamo, gihangayikishije cyane kuko cyongera impungenge z’ejo hazaza h’uru rubyiruko ndetse n’ah’igihugu kuko rufatwa nk’u Rwanda rw’ejo.

Nubwo bimeza bityo ariko ngo ababyeyi nabo si shyashya kuko harabo usanga nabo ubwabo barananiwe kubana neza hagati yabo ntibabone umwanya wo kwita ku bana babo ngo babahe uburere bukwiye hakiri kare kandi ngo ‘igiti kigororwa kikiri gito.’

Ababyeyi batewe impungenge n'abana babo batakibumva ngo bagire icyo babafasha mu rugo ahubwo bakirirwa muri telefone umunsi wose

Mu kugaragaza iki kibazo, hari bamwe mu babyeyi baganiriye na InyaRwanda bumvikanisha ko bafite impungenge z’uko mu gihe kiri imbere abana babo bazaba batagishoboye gutekereza neza ugasanga bavuyemo abanebwe batagize n’icyo bamariye igihugu.

Umwe muri bo yagize ati: ‘‘Mfite umwana w’umukobwa urangije secondaire ariko kuva yava gukora ikizamini cya Leta ntacyo mubwira ngo anyumve. Abyukira muri telefone akayirirwamo akanayararamo sinzi ibyo aba arebamo bidashira.

Ubu aho kugira ngo abyuke akubure ateke angaburire nk’umuntu ubyiruye inkumi ninjye umushyira ibiryo nabwo akabirya arangariye muri telefone.’’

Undi nawe yashimangiye ko ahangayikishijwe n’uko hazaza h’abana be hashobora kutaba heza kandi mu by’ukuri ntacyo bamuburanye.

Aho yagize ati: ‘‘Njyewe ubu naranabihoreye sinkirirwa nterana amagambo nabo kuko nta n’ikinyabupfura bacyigira. Umuntu aba yaravunitse akirya akimara ariko bakanga bakatunanira. 

Ubu ngo bari mu kiruhuko ariko sinzi aho birirwa n’iyo batahutse bajya muri izo telefone zabo ukabavugisha ntibanumve. Wabahanura wabakuye he? Babaye abanebwe byararangiye sinzi niba bazashobora no kwibeshaho.’’

Hagataho, abana bavuga ko imyitwarire bafite bayikomora ku babyeyi babo

Ku ruhande rw’abana bo bumvikanisha ko ibyo bakora baba bagendana n’igihe gusa ku bijyanye n’imyitwarire ngo ababyeyi nabo babifitemo uruhare kuko niko babareze.

Uwo twaganiriye usoje ayisumbuye yagize ati: ‘‘Esubu wirengagije ko muri iki gihe ikintu cya mbere ari amakuru? Reba ndasoje, nta kazi nukwirirwana na Mama ashaka ko wirirwa mu mirimo gusa wafata phone akagutonganya umunsi wose! Njye mpitamo kwigendera nkataha nimugoroba.’’

Undi musore uri mu kiruhuko nawe yagize ati: ‘‘Njyewe nakuze nimenya nderwa n’umukozi ababyeyi mbabona gak gashoboka. Rero imirimo yo mu rugo ntayo nzi pe niyo mpamvu nirirwa kuri telefone ndeba aho isi igeze cyane ko abantu basigaye bahakura n’akazi katavunanye kandi kishyura neza.’’

Impuguke mu by'imitekerereze n'imibanire ya muntu yasabye abantu bose kwiga gukoresha telefone ku gipimo kigereranije ntibatwarwe nazo

Munezero Elie, impuguke mu by’imibanire ya muntu yavuze ko biteye impungenge cyane ariko ababyeyi bakwiye kugerageza bagahindura imyumvire n’abana nabo ntibatwarwe na telefone cyane ngo barengere kandi bakamenya kuyirebamo iby’umumaro.

Impuguke yagize iti: ‘‘Twabishaka tutabishaka, ababyeyi bagomba kwakira impinduka z’ikinyejana. Abakiri bato nabo bakwiye gutozwa imirimo hakiri kare kandi ntibemerere telephone kubabera imbogamizi ahubwo zikababera uburyo bwo koroshya ubuzima n’iterambere.’’

Yakomeje avuga ko nubwo telefone kurubu yifashishwa mu koroshya byinshi ariko na none ari igikoresho kirangaza abana cyane ndetse usanga ari ikibazo gihangayikishije ababyeyi bumva ko abana babo nta mirimo bazamenya gukora, ibintu rimwe na rimwe bikunze kuzana umwuka mubi hagati y’abana n’ababyeyi bitewe no kutuzuzanya mu nshingano bari basangiye. 

Munezero akomeza akangurira urubyiruko n’abantu bose kumenya gukoresha neza terefone mu gihe gikwiye, ubundi bagakora ibindi bifitiye umuryango ndetse n’igihugu akamaro.

Munezero yanaburiye ababyeyi gukurikirana abana babo bakamenya ibyo baba bareba muri telefone kuko abenshi usanga imyitwarire mibi bagira irimo imvugo zidahwitse, gusuzugura, ubuzererezi, kubeshya no kwishora mu zindi ngeso mbi babyigana babikuye mubyo birirwa bareba ku ikoranabuhanga.