King James yasobanuye album ya munani iriho indirimbo ‘Mfata’ yasohoye-VIDEO

King James avuga ko ataramenya indirimbo zizaba zigize iyi album ye, ariko hashize amezi macye asohoye indirimbo ebyiri zirimo ‘Sinshaka ko uryama ubabaye’ ndetse na ‘Turacyari Babandi’ ziri mu zigize iyi album ye munani.

Uyu munyamuziki yabwiye InyaRwanda ko n’ubwo abantu bamuzi cyane mu ndirimbo zigaruka ku rukundo, iyi album ye nshya ‘izanitsa kuzindi ngingo z’ubuzima busanzwe’ ku buryo yizera ko abakunzi be bazanogerwa mu bihe binyuranye.

King James avuga ko ategura iyi album yatekereje ku bahanzi bo mu kiragano gishya cy’umuziki ndetse n’abandi bamaze igihe nk’icye mu muziki.

Ati “Izaba iriho indirimbo nakoranye n’abahanzi bo mu gihe cyanjye mu muziki ndetse n’abahanzi bashya bagezweho muri iki gihe.”

Ni album avuga ko ari gukora abifashijwemo na ba Producer bamaze igihe kinini mu muziki ndetse na ba Producer bo muri iki gihe. Ati “Ni album izafata ibisekuru byombi, kandi ndizera abantu bazanogerwa.”

Uyu muhanzi atangaje ko ageze kuri 80% ategura album ya munani, mu gihe aherutse kugaragara kuri album ya Juno Kizigenza aho bakoranye indirimbo yitwa ‘You’.

King James avuga ko gukorana indirimbo na Juno Kizigenza, ahanini byaturutse ku kuba ‘ari umuhanzi w’umuhanga kandi ugira ikinyabupfura’. Ati “Ibyo byose byorohereje gukorana nawe, kandi ndizera abantu barakunze iriya ndrimbo’.

Uyu muhanzi wegukanye Primus Guma Guma Super Stars, avuga ko indirimbo ye ‘Mfata’ ijyanye n’ibihe by’impeshyi, kuko irabyinitse kandi izafasha cyane abakundana bashaka kubyinana bizihiza urukundo rw’abo.

Ati “Ni indirimbo ibyinitse, muri rusange natekereje kubakundana, bageze muri iki gihe cy’impeshyi. Ni ukubwira umuntu mugiye kubyinana, turi mu bihe by’impeshyi, abakundana bakagerana, bakabyinana neza.”

King James yatangaje umushinga wa album ye ya munani, nyuma y’uko ashyize ku isoko album ya karindwi yise ‘Ubushobozi’ iriho indirimbo yakoranye n’abahanzi banyuranye ndetse n’ize bwite.

Ni album yacuruje ku rubuga rwa Zana Talent yashinze, kandi yamwinjirije arenga Miliyoni 60 Frw.

King James yasohoye amashusho y’indirimbo ‘Mfata’ yageneye abakundana

King James yavuze ko ageze kuri 80% ategura album ye ya munani

KANDA HANO UREBE AMASHUSHO Y’INDIRIMBO ‘MFATA’ YA KING JAMES

">