Ahabanza Imyidagaduro

Afite imyaka 20! Fanta, Producer mushya uri kwifashishwa n’abahanzi

Yanditswe na: Daniel HAVUGARUREMA
Taliki:11/05/2023 15:29 0

N’ubwo nta mwaka aramara atangiye urugendo rwo gutunganya indirimbo, Producer Fanta w’imyaka 20 y’amavuko yatangiye kwifashishwa n’abahanzi bakomeye, kandi izina rye riri kumvikana cyane mu ndirimbo zigezweho muri iki gihe.

Producer Fanta afite ubuhanga mu gufata no gutunganya amajwi y’imiziki igezweho. Akorera muri studio ya Downtown Records.

Mu bahanzi amaze gukorera harimo Safi Madiba yakoreye indirimbo “Day to day”, Sintex yafashije “Hand of God”, Uncle Austin yakoreye “Igipfunsi” yakoranye na Victor Rukotana, Papa Cyangwe yakoreye “We sha” n’abandi.

Uyu musore umaze igihe gito atangiye gutunganya umuziki nk’umwuga yabwiye InyaRwanda ko ahishiye byinshi abanyarwanda kandi ko ashimira bimwe mu byamamare bikomeje kumutiza amaboko.

Ati “Ndashimira abahanzi bakomeje kumfata ukuboko, ntabwo narinzi ko aha ndi nahagera ariko biri kuza. Yego nzi kuririmba kandi hari indirimbo nshya ngurisha ku bahanzi batandukanye, birashoboka ko mu gihe runaka nanjye nashyira hanze yanjye bwite."

Fanta yakomeje avuga ko uretse gufata no gutunganya amajwi, asanganywe ubuhanga mu kuririmba no kwandika indirimbo ndetse ko hari izo yatangiye kugurisha abanda bahanzi.

Uyu musore ukiri muto yongeyeho ko binashoboka ko yashyira hanze indirimbo ye bwite n’ubwo atazi igihe.

Amakuru avuga ko Fanta ari gukora ku mishinga mishya igiye gusohoka y’abahanzi bakomeye barimo Platini P ubarizwa muri One Percent International, n’umuhanzi w’Umunyamakuru Yago for Real.