Menya imikoreshereze y'ikarita y'umweru n'iy'icyatsi mu mupira w'amaguru

Mu 1970 ni bwo FIFA yashyizeho ko amakarita azajya akoreshwa mu mukino ari 2 gusa: ikarita y'umuhondo ihabwa umukinnyi ukoze ikosa rikomeye ariko ryakwihanganirwa ndetse n'ikarita itukura ihabwa umukinnyi ukoze ikosa rikabije rinatuma ahita asohorwa mu kibuga, byaba ngombwa agasiba n'imikino runaka bitewe n'amabwiriza y'irushanwa. 

Nta minsi ishize abantu babonye ibisa nk'igitangaza muri Portugal ubwo umusifuzi Catarina Campos yerekaga abaganga ba Benfica na Sporting ikarita y'umweru nyuma yo gutabara umukinnyi wari uri ku ntebe y'abasimbura wari ugize ikibazo, igice cya mbere cyari kigiye kurangira.

Ubwo umusifuzi bwa mbere yatangaga ikarita y'umweru

Ibi byahise bizamura impaka ku isi yose aho benshi bavugaga ko Catarina akoze ibara, abandi bari basanzwe babizi babonye ari nk'ibyahanuwe bisohoye. 

Tugiye kureba amakarita abiri yongerwe mu mupira w'amaguru uburyo akoreshwa kuko abantu benshi ntabwo bayazi 

Ikarita y'umweru

Muri rusange ikarita y'umuhondo n'itukura zisanzwe zikoreshwa nk'igihano ku ikosa umukinnyi cyangwa umutoza akoze. Gusa ku ikarita yera ho si ko bimeze kuko ihabwa umuntu wagize igikorwa cy'ubumuntu mbese nyine cyo gushimira (Sportsmanship and Fair play). Ashobora kuba umukinnyi, umutoza, umuganga n'undi wese ufite aho ahurira n'ibikorwa by'ikipe ku kibuga.  

Ku itariki ya 23 Mutarama ni bwo muri Portugal umusifuzi wasifura umukino Benfica y'Abagore yanyagiragamo Sporting ibitego 3-0 yerekanye iyi karita bwa mbere. Portugal ni cyo gihugu rukumbi ku Isi cyamaze kwemeza imikoreshereze y'ikarita y'umweru ariko baracyari kubigerageza gacye gacye.

Umwe mu baganga bahawe ikarita y'umweru muri uyu mukino

Ikarita y'icyatsi kibisi

Iyi karita ihabwa umukinnyi ukoze ikosa rikomeye kurenza iry'iy'umuhondo ariko nanone ritagejeje ku kigero cy'iy'umutuku. 

Amategeko ya CONIFA (Igikombe cy'Isi cy'ibihugu bitabarizwa muri FIFA), avuga ko uhawe iyi ikarita ahita asohoka mu kibuga ako kanya ariko ikipe ye ikaba yemerewe kumusimbuza mu gihe itararangiza abo yemerewe gusimbuza. Ikindi kandi umukinnyi wahawe ikarita y'icyatsi kibisi ntabwo asiba umukino ukurikiraho. 

Iyi karita yakoreshejwe bwa mbere mu gikombe cy'Isi cy'ibihugu bitabarizwa muri FIFA ahubwo bibarizwa muri CONIFA, byabaye mu mwaka wa 2018 ndetse byigeze no kuba mu cyiciro cya kabiri mu Butaliyani (Serie B) ubwo umukinnyi Christian Galana yaburanyaga umusifuzi ku cyemezo yari afashe. 

Ikarita y'icyatsi