Notorious B.I.G yahawe icyubahiro ashyirwa ku nkweto za Air Jordan

Izi nkweto nshya zizwi mu bwoko bwa 'Sneakers' zashyizwe ku rubuga rwa Instagram rw'uyu muraperi, batangaza ko uyu mushinga wakozwe ku bufutanye bw'Umuryango wo kwibuka Christopher Wallace 'Biggie' (Christopher Wallace Memorial Foundation) na Air Jordan. 

Notorious Biggie yahawe icyubahiro ashyirwa ku nkweto za Air Jordan

Mu butumwa bakurikije amafoto bagize bati "Christopher Wallace Memorial Foundation na @sothebys bafatanyije mu gushyira hanze inkweto nke za Christopher Wallace Air Jordan XIII mu rwego rwo guha icyubahiro #JORDANYEAR(2023), no kwizihiza imyaka 50 Hip Hop imaze ishinzwe."

Bakomeje bagira bati “Amafaranga azava mu kuzigurisha azagirira akamaro Umuryango wo kwibuka Christopher Wallace, ugamije guha imbaraga urubyiruko rwo mu mujyi hatangwa ibikoresho bifasha mu kwiga, kubatera inkunga, no gushyiraho gahunda z’ubujyanama n’ubukangurambaga.

 Byose bigendanye n’intego y'uyu muryango, Tekereza byaguye (Think B.I.G. 'Books Instead of Gun') 'Ibitabo mu mwanya w'imbunda.'

Inkweto zahawe izina rya 'Christopher Wallace Air Jordan XIII' 

Nk'uko HipHop Dx ibitangaza imiguru 23 y'izi nkweto iri gukorerwa imurikagurishwa rusanjye muri galeries ya Sotheby iri i New York, kuva ku ya 23 Mutarama kuzageza ku ya 3 Gashyantare, ku mafaranga ari hejuru y'idorari rimwe.

Mu gushyingo 2022 abaraperi barimo Grandmaster Flash, Roxanne Shante, Slick Rick n'abandi basuye umujyi wa New York Biggie yavukiyemo bari kumwe n'umuyobozi wawo Eric Adams.

Icyo gihe batangaje ko hari ibirori biteganijwe byo kwizihiza isabukuru y'uyu muraperi y'imyaka 50, bizashyirwa mu bikorwa muri uyu mwaka wa 2023 ndetse bizakorwa ku bufatanye n'inzu ndangamurage ya Bronx's Universal Hip Hop, izafungura imiryango muri 2024.

Izi nkweto zashyizweho mu rwego rwo kwizihiza no guha icyubahiro Biggie ku myaka 50 yari kuba yujuje uyu mwaka.