Somalia: Amerika yahishuye ko yinjiye mu ntambara yishemo inyeshyamba 27 za Al Shabab

Nyuma y'uko Amerika itangaje ko yishe intangondwa ziyitirira amahame y'idini ya Islam byahaye icyizere abanyasomalia ko umutwe wa Al Shabab utorohewe n'ibitero byatumye utakaza uduce bari barigaruriye. Kuwa gatatu Tariki ya 22 Nzeri 2022, Ingabo za Leta y'Amerika zagabye ibitero, zikoresheje indege z'intambara mu ntara ya Hiran iherereye mu gihugu hagati.

Iki gitero Amerika yigambye cyaguyemo abarwanyi ba Al shabab 27, cyabaye gikurikira ibyatangajwe na Leta ya Somalia imaze iminsi yigamba guca intege intangondwa zivuga ko ziharanira amahame y'idini y'islilamu. Ibihe bitandukanye Abategetsi ba Somalia batangaje ko birukanye Al Shabab mu duce yari yarigaruriye.

Nyuma y'igitero cyahitanye abantu 21 cyabaye mu kwezi gushize kibereye kuri hotel mu murwa mukuru ndetse hiyongereho uburakari abaturage bari bafitiye intangondwa za Al shabab abaturage bo mu ntara zo hagati mu gihugu bafashe intwaro bafasha ingabo za Leta guhangana n'uwo mutwe w'iterabwoba.

Africom dukesha iyi nkuru yatangaje ko abarwanyi ba Al Shabab 27 bishwe n'ingabo za Amerika zirwanira mu kirere, ubwo bageragezaga kugaba ibitero ku ngabo za Leta Somalia. Muri iki cyumweru Leta yari yatangaje ko yongeye kwisubiza umujyi wa baaco iherereye muri Hiran.

Nyuma yo gutangaza ko Amerika yishe inyeshyamba za Al shabab byatumye hamenyekane ko umugambi kurandura Al shabab ku butaka bwa Somalia uhuriweho n'imitwe y'abaturage bafashe intwaro bakiyimeza gufatanya n'ingabo za Leta guhashya al Shabab ndetse hakiyongeraho Amerika yinjiye mu rugamba rwihishwa.

Imiryango iharanira uburenganzira bw'ikiremwa Muntu ikunze kunenga uburyo Amerika igaba ibitero byo guhashya abakora iterabwoba ariko bigakorwa rwihishwa ndetse rimwe rimwe bigahitana abasiviri.