Raila Odinga uherutse gutsindwa mu matora yq Perezida wa Kenya, ntabwo azitabira umuhango wo kurahira kwa Perezida watowe William Ruto, uba kuri uyu wa Kabiri i Nairobi muri Kenya.
Mu itangazo ryasohotse kuri uyu wa Mbere, Odinga yemeye ko Ruto yamutumiye ku giti cye mu birori byo kurahirira kuyobora Kenya, gusa atangaza ko atazubahiriza ubwo butumire.
Odinga ati "Kuri uyu mugoroba, nakiriye ibaruwa na telefone ya H.E Dr. William Ruto antumira mu birori bye byo kurahia ejo ku ya 13 Nzeri 2022. Ariko ntabwo nzaboneka ku muhango wo kurahira kuko ndi hanze y'igihugu kandi nanjye mfite izindi mpungenge zikomeye nk'uko byavuzwe".
Raila Odinga watsinzwe amatora ku mwanya w'umukuru w'igihugu cya Kenya
Odinga yongeye gushimangira ko Komisiyo yigenga ishinzwe amatora itakoze amatora mu mucyo. Muri iryo tangazo, Odinga yakomeje avuga ko icyemezo cy'Urukiko rw'Ikirenga cyemeje amatora ya Ruto "kitari gishingiye ku kuri no ku mategeko, nubwo twemeye."
Ati: "Kubera izo mpamvu, ibyavuye mu matora ntibiramenyekana."
Avuga ko namara gusubira mu gihugu, azafatanya n'abayobozi b'ishyaka rya Coalition ya Kenya rya Azimio la Umoja, "tuzatangaza intambwe zizakurikiraho mu gihe dushaka gushimangira demokarasi yacu". Yungamo ati: "Turashobora kubikora ari uko duhinduye kandi tugahindura inzego z'ingenzi zishinzwe kurinda no guteza imbere demokarasi yacu."
Twabibutsa ko Raila Odinga ava mu muryango uzwi cyane muri Kenya, ikamba rya politiki ryamye rimucika mu gihe cy'imyaka ibarirwa muri za mirongo amaze muri politiki - nkuko ryacitse se, wabaye Visi Perezida wa Kenya nyuma y'uko iki gihugu kibonye ubwigenge ku Bwongereza.
Ikinyamakuru The East African cyatangaje ko irahira rya William Ruto rizitabirwa n'Abakuru b'Ibihugu barimo: Perezida w'u Rwanda, Paul Kagame; Perezida w'u Burundi, Ndayishimiye Evariste; Perezida wa Uganda, Yoweli Museveni; Perezida wa Tanzania, Samia Suhuku Hassan; Perezida wa Sudani y'Epfo, Salva Kiir; na Perezida wa DR Congo, Felix Tshisekedi.
Eng
RSS 
TANGA IGITECYEREZO