Kim Kardashian arifuza umukunzi mushya uruta Pete Davidson baherutse gutandukana

Uyu munyamideli yavuze ko yifuza umukunzi uruta mu myaka Pete Davidson batandukanye kuko ikinyuranyo cy'imyaka yari iri hagati ye nawe yagize uruhare runini mu itandukana ryabo dore ko Kim afite imyaka 41 naho Pete akaba afite imyaka 28 y'amavuko.

Kim Kardashian amaze igihe gito atandukanye na Pete Davidson

Mu kiganiro Kim Kardashian yagiranye na Televiziyo y'imyidagaduro, E!News, ari nayo icishaho ikiganiro 'Keepin Up With The Kardashians' cyerekana ubuzima bw'umuryango we, uyu munyamideli yagarutse ku buzima bwe bw'urukundo nyuma yo gutandukana na Pete Davidson bamaranye amezi 9 mu munyenga w'urukundo. 

Ababijwe niba yifuza kongera gukundana Kim yasubije ati: ''Yego ndifuza kongera gukundana gusa ndashaka umukunzi ukuze mu myaka uruta Pete Davidson kuko mu byatumye dutandukana harimo imyaka yacu. Ndifuza ko uwo tuzakundana azaba yumva ubuzima mbayemo ko ndi umuntu uhora imbere ya camera kandi akabyakira kuko abantu benshi ntibabikunda''.

Kim Kardashian wahoze ari umugore wa Kanye West banafitanye abana bane, yakomeje agira ati: ''Nizera ko urukundo nyarwo rukibaho kandi sinzarekera kubyizera kugeza igihe nzabonera uwanjye tuzabana ubuziraherezo''. 

Abajijwe niba hari amahirwe yo kwiyunga na Kanye West, Kim yagize ati ''Ayo mahirwe iyaba ahari simba naratse gatanya gusa twembi tuzakora ibishoboka dufatanye kurera abana bacu ariko gusubirana ntabyo mbona''.

Kim Kardashian wifuza umukunzi mushya yavuze ko atifuza gusubirana na Kanye West

Ibi Kim Kardashian abitangaje mu gihe gito gishize atandukanye na Pete Davidson ndetse mu gihe hakomeje kuvugwa ko hari amahirwe menshi ko yasubirana na Kanye West nubwo we yabiteye utwatsi akavuga ko yiteguye komgera gukundana gusa umukunzi we mushya agomba kuba akuze mu myaka.