Haiti: Minisitiri w’intebe Ariel Henry yangiwe kuva mu gihugu kubera iperereza ku rupfu rwa Perezida Jovenel Moise

Muri iki kirego, umushinjacyaha arimo gushaka gushyira ibirego kuri Ariel Henry, wasabwe gusobanura aho ahuriye n’ucyekwa muri ubwo bwicayi, Josepg Felix Badio, kubera ko ngo ibimenyetso bigaragaza ko aba bagabo bombi bagiranye ibiganiro byinshi kuri telefone hashize amasaha make Perezida yishwe, nk’uko abashinjacyaha babivuga.

Bwana Moïse yiciwe mu rugo rwe ku itariki ya 7 y'ukwezi kwa karindwi muri uyu mwaka wa 2021. Yishwe arashwe nyuma y’uko abagabo bitwaje imbunda biraye mu rugo rwihariye rwe, hafi y'umurwa mukuru Port-au-Prince. Urupfu rwe rwateje impagarara muri politiki, yahuhuwe n'umutingito wiganje cyane mu majyepfo y'iki gihugu mu kwezi kwa Kanama 2021. 

Ku wa mbere, Bwana Henry yohereje ibaruwa bigaragara ko ari uri kwirukana ku kazi umushinjacyaha mukuru Bed-Ford Claude, anamushinja ikosa rikomeye ry'imiyoborere.

Nyuma yatangaje uwo kumusimbura, gusa bigaragara ko  Bwana Claude yari akiri mu kazi ke, ubwo yasabaga umucamanza ukora iperereza ku iyicwa rya Bwana Moïse kurega Minisitiri w'intebe kubera uruhare acyekwaho muri ubwo bwicanyi. Abazi ibyo muri Haïti bavuga ko kwirukana umushinjacyaha bitari mu nshingano za minisitiri w'intebe.

Minisitiri w'ubutabera wa Haïti yategetse  ko Bwana Claude yongererwa abapolisi bo kumurinda, nyuma y’uko hatangajwe ko hari igitugu yagiye ashyirwaho.